“Ölkəmizi tanıyaq” maarifləndirici tur-aksiyasının Kürdəmir və Tərtər rayonlarından olan iştirakçıları İsmayıllı ilə tanışlıqdan sonra avqustun 22-də axşam saatlarında Qəbələyə gəldilər.

AzərTAc xəbər verir ki, Qəbələdəki “Qafqaz Yeddi Gözəl” otelində yüksək səviyyədə qarşılanan və yerləşdirilən şagirdlər proqram əsasında avqustun 23-də rayonun sosial-iqtisadi inkişafı istiqamətində görülən işlər, son illərdə inşa edilən sosial obyektlər, əyləncə və istirahət mərkəzləri, tarixi-mədəniyyət abidələri, turizm obyektləri, muzeyləri ilə tanış olacaqlar.

 Əvvəlcə oteldə şagirdlərə İsmayıllı-Qəbələ-Şəki marşrutu üzrə təşkil edilən və maarifləndirici xarakter daşıyan bu tur-aksiyanın əhəmiyyəti barədə geniş məlumat verildi. Sonra Kürdəmir və Tərtər rayonlarının orta ümumtəhsil məktəblərini təmsil edən 80 şagird musiqili-əyləncəli tədbirə qatıldı.

 Şagirdlərə Qəbələnin tarixi, adət-ənənələri, coğrafiyası, turizm obyektləri, tarixi-mədəni abidələri haqqında məlumat verildi, onların sualları cavablandırıldı. Sonra şagirdlərin iştirakı ilə intellektual oyunlar, müxtəlif viktorinalar keçirildi, musiqili-əyləncəli gecə təşkil olundu.