Böyüməkdə olan gənc nəslin yay istirahətinin mənalı və səmərəli təşkili, onların Vətənə məhəbbət, dövlətçilik ruhunda tərbiyəsi istiqamətində Səbail Rayon İcra Hakimiyyəti, DİN Daxili Qoşunları və Azərbaycan Beynəlxalq Təhsil Kompleksinin birgə layihəsinə yekun vurulmuş, layihə çərçivəsində təşkil olunan “Şahinlər” hərbi-vətənpərvərlik təmayüllü düşərgədə yeniyetmələrin yay istirahəti başa çatmışdır.

Bu münasibətlə yeniyetmələrin yay istirahətinin səmərəli təşkili ilə bağlı keçirilən növbəti tədbirin təntənəli bağlanış mərasimi keçirilmişdir. Xatırladaq ki, rayonda yaşayan Qarabağ müharibəsi veteranları və əlillərin övladları, aztəminatlı və imkansız ailələrin uşaqları, təhsildə və idmanda fərqlənən şagirdlər, həmçinin “SOS-Azərbaycan” uşaq kəndində tərbiyə alan 250-dən çox yeniyetmə üçün Quba şəhərinin ən mənzərəli yerində yerləşən Azərbaycan Beynəlxalq Təhsil Kompleksinin Quba filialının ərazisində təşkil olunmuş hərbi-vətənpərvərlik təmayüllü, ödənişsiz “Şahinlər” yay düşərgəsində iki həftə ərzində keçən mənalı və yaddaqalan istirahət  uşaqların xatirində silinməz izlər buraxmışdır. 

Səbail Rayon İcra Hakimiyyəti və Daxili Qoşunlar tərəfindən hər cür şərait yaradılan düşərgədə şagirdləri gələcəkdə hərbi xidmətə layiqincə hazırlamaq məqsədilə hərbi-səhra çadırı qurulmuş, səhra mətbəxi yerləşdirilmiş, həyətdə xalqımızın ümummilli lideri Heydər Əliyevin və Azərbaycan Respublikasının Prezidenti cənab İlham Əliyevin həyat və fəaliyyətinə, ordu quruculuğuna, Milli Qəhrəman Mübariz İbrahimova, Daxili Qoşunların fəaliyyətinə, eləcə də “Şahinlər” düşərgənin tarixinə həsr edilən stendlər asılmışdır. Düşərgədə məşğələlərin hərbi nizamnaməyə uyğun  keçirilməsi  uşaqların istirahətini daha maraqlı  və yaddaqalan etmişdir.

Uşaqların Qubanın görməli və mənzərəli yerlərinə, rayonun  tarixi guşələrinə, o cümlədən Qubadakı Soyqırımı Muzey-Kompleksinə gəzintiləri təşkil olunmuşdur. Bundan əlavə, istirahətin bir günü Daxili Qoşunlar tərəfindən hərbi-səhra məşğələlərinə həsr olunmuş, gün ərzində şəxsi heyətin yeməyi hərbi-səhra mətbəxi vasitəsilə verilmişdir. Məktəblilərin təlimləri Daxili Qoşunların Quba şəhərindəki hərbi hissəsində keçmiş, burada onlar hərbi hissənin şəxsi heyətinin xidməti, yaşayış şəraiti, silah və texnikası ilə yaxından tanış olmuş, xüsusi təyinatlı bölüyün məşqlərinə qatılmışlar.

Düşərgədə məktəblilərə Vətənimizin, xalqımızın tarixindən bəhs edən dərslər, müxtəlif mövzularda məşğələlər, maraqlı görüşlər keçirilmiş, filmlər nümayiş etdirilmişdir. 

Düşərgənin bağlanışı ilə əlaqədar təşkil olunmuş tədbirdə iştirak edən layihə təşkilatçıları—Səbail Rayon İcra Hakimiyyətinin başçısı Asif Əsgərov,   DİN Daxili Qoşunlarının komandan müavini, general-mayor Fəxrəddin Səmədov və digər qonaqlar uşaqların istirahəti, onlar üçün yaradılmış şəraitlə yaxından tanış olmuş, idman yarışlarında qalib gəlmiş bir qrup şagirdə xatirə medalları və uşaqların tərbiyəsi işlərində fərqlənmiş dəstə rəhbərlərinə və hərbçilərə qiymətli hədiyyələr təqdim etmişlər.

Yeniyetmələr  qonaqlar qarşısında hərbi keçid, müxtəlif hərbi təlimlər və  istirahət dövründə öyrəndiklərini nümayiş etdirmişlər.  Respublikamızın tanınmış incəsənət ustaları və Daxili Qoşunların hərbi orkestrinin iştirakı ilə keçirilən konsert zamanı düşərgədə istirahət edən uşaqlar da  məharətlərini göstərmişlər. 

 Bakıya qayıdan  yeniyetmələr və onların valideynləri  istirahətin təşkilatçılarına öz minnətdarlıqlarını bildirmişlər.

Ə.BAYRAMOV,

“Xalq qəzeti”