Sentyabrın 6-da Azərbaycan Milli Elmlər Akademiyasının (AMEA) Rəyasət Heyətində "Kibernetika və informatika problemləri" mövzusunda III Beynəlxalq konfrans öz işinə başlayacaqdır.
AMEA-nın İnformasiya Texnologiyaları İnstitutundan bildirmişlər ki, beynəlxalq konfrans informasiya və kommunikasiya texnologiyaları, intellektual texnologiyalar və sistemlər, modelləşdirmə və identifikasiya, tətbiqi stoxastik analiz, idarəetmə və optimallaşdırma, sosial-iqtisadi sistemlərdə qərarların qəbulu, ədədi üsullar və hesablama texnologiyaları üzrə elmi istiqamətləri əhatə edir.
Konfransın təşkilatçıları Rabitə və İnformasiya Texnologiyaları Nazirliyi, AMEA, Təhsil Nazirliyi, "Abdus Salam" Nəzəri Fizika Beynəlxalq Mərkəzi, AMEA-nın Kibernetika və İnformasiya Texnologiyaları institutları, Milli Aviasiya Akademiyası, Bakı Dövlət Universiteti, BDU-nun Tətbiqi Riyaziyyat Elmi-Tədqiqat İnstitutu, Azərbaycan Dövlət Neft Akademiyası və Azərbaycan Texniki Universitetidir.
Beynəlxalq tədbirdə ABŞ, Rusiya, İtaliya, Koreya Respublikası, İran, Türkiyə, Gürcüstan, Belarus və digər ölkələrdən olan alimlərin iştirakı nəzərdə tutulmuşdur.
Konfrans öz işini sentyabrın 8-dək bölmələr üzrə davam etdirəcəkdir.
AzərTAc{nl}