Xəzər Rayon Gənclər və İdman İdarəsi (XRGİİ) və Xəzər İntellektual Gənclər Klubunun (XİGK) təşkilatçılığı ilə rayonun gənclər evində Beynəlxalq Gənclər Gününə həsr olunmuş “Nə? Harada? Nə zaman?” intellektual oyunu üzrə  rayonun açıq çempionatı keçirilib.

Gənclər arasında bu tədbirin təşkilində əsas məqsəd “Azərbaycan Gəncliyi Dövlət Proqramı”nın icrasını təmin etmək, gənclərin intellektual səviyyəsini, dünyagörüşünü yüksəltmək, zehni inkişafını sürətləndirmək, onlar arasında bilik və elmin nüfuzunu artırmaq, eləcə də asudə vaxtlarının səmərəli təşkil olunmasına nail olmaqdır. XRGİİ-nin rəisi Vüqar Əliyev komandaların yüksək səviyyədə hazırlaşdığı bu yarışın gərgin mübarizə şəraitində keçdiyini bildirib,  belə yarışların təşkilinin ənənə halını aldığını qeyd edib.

Tədbirdə “Veni Vidi Vici”,  “Poverful”, “İnterpreters United”, “Young Boys”, “Feniks”, “Renesans”, “Boss”, “Alpha Omega”  komandaları iştirak edib.

Yekun nəticələrə görə, “İnterpreters United” komandası birinci, “Poverful” komandası ikinci, “Veni Vidi Vici” isə üçüncü yeri tutub.

Xəzər Rayon Gənclər və İdman İdarəsi tərəfindən yarışın qaliblərinə kubok , diplom və xatirə hədiyyələri  təqdim olunub.

Leyla QURBANOVA,

“Xalq qəzeti”