Avqustun 8-də Tələbə Qəbulu üzrə Dövlət Komissiyasında (TQDK) mətbuat konfransı keçirildi.

Konfransda TQDK-nın sədri Məleykə Abbaszadə 2014/2015-ci tədris ili üçün Azərbaycan Respublikasının ali təhsil müəssisələrinə tələbə qəbulu müsabiqəsinin nəticələri barədə fikirlərini açıqladı.

Bildirildi ki, ali təhsil müəssisələrinin müsabiqəsində 35 min 995 abituriyent iştirak edib. Onlardan 33 min 713 nəfəri ali təhsil müəssisələrinə (I mərhələdən sonra) qəbul olunub. Ali təhsil müəssisələrinə qəbul olunmuş abituriyentlərin siyahısı və müsabiqə nəticəsində formalaşmış keçid balları “Abituriyent” jurnalının 7-ci nömrəsində dərc edilib. 

Tələbə adı qazanmış şəxslər avqustun 8-dən 18-dək sənədlərini daxil olduqları təhsil müəssisəsinə təqdim etməklə qeydiyyatdan keçməlidirlər.

Diqqətə çatdırıldı ki, ali təhsil müəssisələrinin boş qalan (vakant) plan yerləri (boş qalan plan yerlərinin sayı 4050-dir) üzrə ixtisas seçimi internet vasitəsilə avqustun 8-dən avqustun 13-dək davam edəcək. Birinci ixtisas qrupu üzrə 945, ikinci ixtisas qrupu üzrə 1116, üçüncü ixtisas qrupu üzrə 981, dördüncü ixtisas qrupu üzrə 1008 boş (vakant) yer qalıb.

Eyni zamanda məlumat verildi ki, 2014/2015-ci tədris ili üçün ümumi orta təhsil bazasında (IX illik) orta ixtisas təhsili müəssisələrinin boş qalan plan yerlərinə (boş qalan plan yerlərinin sayı 2116-dır) ixtisas seçimi keçirilir. Müsabiqə ümumi orta təhsil bazasında orta ixtisas təhsili müəssisələrinə keçirilmiş qəbul və ya IX siniflər üzrə buraxılış imtahanında toplanılan ballar əsasında aparılır. Boş qalan ixtisasların siyahısı “Abituriyent” jurnalının xüsusi buraxılışında təqdim olunub.

Ali təhsil müəssisələrinin magistraturalarının boş qalan plan yerlərinə (boş qalan plan yerlərinin sayı 1442-dir) ixtisas seçimi davam edir. Boş qalan plan yerləri olan ixtisaslaşmaların siyahısı “Magistr” jurnalının 6-cı nömrəsində dərc edilib. 

Konfransda qeyd olunub ki, tam orta təhsil bazasında (XI illik) orta ixtisas təhsili müəssisələrinə ixtisas seçimi başlanır. Tam orta təhsil bazasında orta ixtisas təhsili müəssisələrinə tələbə qəbulu müsabiqəsi respublikanın ali təhsil müəssisələrinə və tam orta təhsil bazasında orta ixtisas təhsili müəssisələrinə qəbul imtahanlarında toplanılan ballar əsasında aparılır. Tam orta təhsil bazasında orta ixtisas təhsili müəssisələrinə tələbə qəbulu müsabiqəsində iştirak etmək üçün ixtisas seçimi internet vasitəsilə avqustun 8-dən 13-dək davam edəcək.

Sonra M. Abbaszadə jurnalistləri maraqlandıran suallara cavab verib.

AzərTAc