Bakı Ali Neft Məktəbindən verilən məlumata görə, sənədi hər iki təhsil ocağının rektoru Elmar Qasımov və Tadueş Slomka imzalamışlar.  Sənəddə tələbə və mütəxəssislərin mübadiləsi, tədris proqramlarının hazırlanması və tətbiqi, birgə tədqiqatların aparılması, elmi forumların təşkili, informasiya resurslarının mübadiləsi və s. kimi məsələlər üzrə fəaliyyət nəzərdə tutulmuşdur.

E. Qasımov Azərbaycan ilə Polşa arasında olan əlaqələrin böyük tarixə malik olduğunu, hələ XIX əsrin sonlarından polşalı mütəxəssislərin Bakıda müxtəlif sahələrdə fəaliyyət göstərdiklərini xatırlatmış, məşhur polşalı mühəndis Pavel Pototskinin Bibiheybət ərazisinin bir hissəsinin torpaqlanmasında və orada dəniz neftinin hasilatı üçün imkanlar yaradılmasında müstəsna rol oynadığını vurğulamışdır. Bakı Ali Neft Məktəbinin rektoru iki ölkə arasında çoxşaxəli əməkdaşlıq əlaqələrinin yüksələn xətlə inkişaf etdiyini qeyd etmişdir.

T. Slomka Bakıda polşalı mütəxəssislərin fəaliyyətinə yüksək qiymət verildiyinə görə minnətdarlığını bildirmişdir.

O, Polşanın məşhur ali təhsil ocaqlarından birinin rəhbəri kimi hər iki ölkənin təhsil mərkəzləri ilə əməkdaşlığın inkişafına hərtərəfli dəstək verməyə hazır olduqlarını diqqətə çatdırmışdır.

Görüşün sonunda  professor T. Slomkaya Bakı Ali Neft Məktəbinin “Fəxri qonaq” diplomu təqdim edilmişdir.

V. BAYRAMOV, “Xalq qəzeti”