Azərbaycan Respublikası Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti “Karyerada ilk addım” devizi altında aktiv məşğulluq tədbirlərini Bakı Biznes Universitetində davam etdirmişdir.

Universitetin tələbə və məzunlarının əmək bazarına inteqrasiyasına xidmət edən tədbirdə 35-i qeyri-dövlət sektoruna aid 40 müəssisə tərəfindən 330 boş (vakant) iş yeri tələbə və məzunların seçiminə təqdim olunmuşdur. Həmin boş iş yerlərindən 298-i özəl sektora aid müəssisələrdədir.

Aktiv məşğulluq tədbirində tələbələrlə və ali təhsil ocaqlarını bitirərək əmək fəaliyyətinə başlamaq ərəfəsində olan məzunlara boş iş yeri təqdim edən müəssisələrin nümayəndələri arasında əlaqələr yaradılmışdır. İşəgötürənlər gələcəkdə ixtisaslı kadrların seçiminin aparılması üçün tələbə və məzunlardan CV-lər qəbul etmişlər. Həmçinin tələbə və məzunlar mövcud əmək bazarında peşə və ixtisaslara olan tələbat barədə məlumatlar əldə etmişlər. Tədbir zamanı boş vaxtları ərzində müvəqqəti xarakterli işlərlə təmin olunmaq istəyən şəxslər Səyyar Əmək Birjası tərəfindən qeydiyyata alınmışlar.

Məlumat üçün bildirək ki, cari ilin aprel-may aylarında ƏƏSMN tərəfindən ölkənin 7 ali təhsil müəssisəsində tələbə və məzunlar üçün aktiv məşğulluq tədbiri keçirilmişdir. Bu tədbirlərdə 619 nəfərə boş iş yerlərinə göndəriş verilmişdir. 163 nəfər peşə hazırlığı kurslarına yönəldilmiş, 162 nəfər müvəqqəti xarakterli işlərə cəlb olunmaları üçün qeydiyyata alınmışdır. 2560 nəfərdən CV-lər qəbul olunmuşdur.

Əmək və Əhalinin Sosial Müdafiəsi Nazirliyinin ictimaiyyətlə əlaqələr şöbəsindən bildirmişlər ki, “Karyerada ilk addım” devizi altında aktiv məşğulluq tədbirləri il ərzində bir sıra digər ali təhsil müəssisələrində də keçiriləcəkdir.

Z. BƏŞİRQIZI,

“Xalq qəzeti”