Dünən Azərbaycan Dövlət Neft Akademiyasında 2014-cü ilin məzunları ilə görüş keçirildi. Əvvəlcə iştirakçılar ümummilli lider Heydər Əliyevin akademiya binasındakı büstü qarşısına gül çələngi qoydular.

Giriş sözü ilə çıxış edən ADNA rektoru, akademik Siyavuş Qarayev 2014-cü il məzunlarını bu əlamətdar gün münasibətilə təbrik etdi, onlara gələcək fəaliyyətlərində uğurlar arzuladı və bildirdi ki, hər bir tələbə bəşəri ideyaları layiqincə qiymətləndirən, öz parlaq sabahına doğru əzmlə addımlayan müstəqil Azərbaycan dövlətinin gənc mütəxəssisi olaraq, ümummilli lider Heydər Əliyevin təhsil aldığı Neft Akademiyasının məzunu olmaqdan qürur duymalıdır.

Rektorun sözlərinə görə, bu il 1687 nəfər, o cümlədən 114 nəfər əcnəbi bakalavr səviyyəsində və 182 nəfər, o cümlədən 28 nəfər əcnəbi magistr səviyyəsində ADNA-nı bitirmişdir. 153 bakalavr və 88 magistr fərqlənmə diplomuna layiq görülmüşdür.

Akademik Siyavuş  Qarayev əmin olduğunu bildirdi ki, builki məzunlar da təhsil aldıqları qədim elm məbədinin şərəfli adını doğruldacaq, ölkəmizin tərəqqisi və çiçəklənməsi naminə Prezident İlham Əliyevin rəhbərliyi altında uğurla həyata keçirilən genişmiqyaslı sosial-iqtisadi inkişaf proqramlarının reallaşmasına öz töhfələrini verəcəklər.

Sənaye və energetika naziri Natiq Əliyev də tələbələri təbrik etdi, onlara gələcək fəaliyyətlərində uğurlar arzuladı. Nazir özünün də Neft Akademiyasının məzunu olduğunu və bundan qürur duyduğunu bildirdi. Onun sözlərinə görə, ADNA-nın divarları arasında ulu öndər Heydər Əliyev də təhsil alıb, sonralar dəfələrlə bu təhsil ocağında olub, bu qədim elm məbədinin çoxlu görkəmli şəxsiyyətlər yetirdiyini, Azərbaycan dövlətinə və xalqına böyük töhfələr verdiyini söyləyib. Azərbaycanın son 20 illik inkişaf dövrü haqqında danışan natiq qeyd etdi ki, bu inkişafın əsası ulu öndərin konsepsiyası əsasında qoyulub. Onun əsasını isə neft strategiyası təşkil edib. Hazırda Prezident İlham Əliyev qarşıya qeyri-neft sektorunun inkişafı ilə bağlı ciddi vəzifələr qoyub. Məqsəd Azərbaycanın çoxşaxəli inkişafına nail olmaqdır. Bu məqsədlərə çatılması üçün yaşlı nəsillə bərabər bu günkü gənc nəslin, ADNA məzunlarının də üzərinə böyük məsuliyyət düşür.

Milli Məclisin sosial siyasət  komitəsinin sədri Hadı Rəcəbli də ADNA məzunlarına gələcək işlərində uğurlar arzuladı və bildirdi ki, onların təhsil aldıqları akademiya dünyanın ən qədim və nüfuzlu təhsil ocaqlarındandır. Bu günlərdə akademiyanın bir müəllimi AMEA-nın akademiki, iki müəllimi isə müxbir üzvü seçilib.

Sonra akademiyanı fərqlənmə diplomu ilə bitirən geoloji-kəşfiyyat fakültəsinin məzunu Aleksandra Xramtseva, qaz-neft-mədən fakültəsinin məzunu Hacı Əliyev, kimya-texnologiya fakültəsinin məzunu Aysel Ələsgərli, neft-mexanika fakültəsinin məzunu Ləman Babayeva, energetika fakültəsinin məzunu Fərid Hacızadə, istehsalat proseslərinin avtomatlaşdırılması fakültəsinin məzunu Nigar Məmmədli, iqtisadiyyat, beynəlxalq iqtisadi münasibətlər və menecment fakültəsinin məzunu Faiq Hüseynov, eləcə də qaz-neft-mədən fakültəsinin məzunu Cavid Şərifzadənin atası Ağasəf Şərifov çıxış edərək 2014-cü il məzunlarını təbrik etdilər. 

Rektor Siyavuş Qarayev ADNA-nı fərqlənmə diplomu ilə bitirən məzunlara diplomlar təqdim etdi.

Paşa ƏMİRCANOV,

“Xalq qəzeti”