İyunun 25-də Azərbaycan Texniki Universitetində (AzTU) 2014-cü ilin məzunlarının buraxılış mərasimi təntənəli şəkildə qeyd edilmişdir.

Əvvəlcə tədbir iştirakçıları ulu öndər Heydər Əliyevin universitetin foyesindəki büstü önünə gül dəstələri qoyaraq, xatirəsini ehtiramla yad etmişlər.

Tədbirdə universitetin rektoru, professor Havar Məmmədov əlamətdar gün münasibətilə məzunları təbrik etmiş, onlara gələcək karyeralarında uğurlar diləmişdir.

Rektor son illərdə Azərbaycanın ali təhsil sahəsində əldə olunmuş nailiyyətlərindən söhbət açmışdır. Bildirmişdir ki, ümummilli lider Heydər Əliyev tərəfindən ölkəmizdə həyata keçirilmiş təhsil islahatları hazırda Ulu Öndərin siyasi kursunun layiqli davamçısı Prezident İlham Əliyev tərəfindən uğurla davam etdirilir.

Son dövrlərdə universitetin maddi-texniki bazasının möhkəmləndirilməsindən, rəhbərlik etdiyi ali təhsil müəssisəsinin qazandığı uğurlardan bəhs edən rektor vurğulamışdır ki, cari tədris ilində AzTU-nu 70-dən çox ixtisas üzrə 1793 gənc  bitirir. Onlardan 1633-ü bakalavr, 160 nəfəri isə magistr pilləsini bitirir. Məzunlardan 27-si təhsilini fərqlənmə diplomu ilə başa vurur.

Milli Məclisin deputatı Elton Məmmədov, “Bakıelektrikşəbəkə” ASC Tədris Mərkəzinin direktoru Vüqar Əliyev, Nəqliyyat Nazirliyi Aparatının rəhbəri Cavid Nəcəfov və başqaları ölkəmizdə təhsilə göstərilən dövlət qayğısından danışmış, yüksəkixtisaslı mütəxəssislər hazırlayan professor-müəllim heyətinin səmərəli əməyini yüksək qiymətləndirmiş və məzunları təbrik etmişlər.

Yüksək bayram əhval-ruhiyyəsində keçən tədbirdə çıxış edən məzunlar da AzTU-da aldıqları təhsilin onların gələcək fəaliyyətlərində böyük rol oynayacağını bildirmiş, daim doğma Azərbaycanımızın inkişafı naminə çalışacaqlarına söz vermişlər.

Sonra universiteti fərqlənmə ilə bitirən məzunlara diplomlar, bu təhsil ocağının ictimai-siyasi həyatında fəallıq göstərən məzunlara fəxri fərmanlar təqdim edilmişdir.

Tədbir konsert proqramı ilə davam etmişdir.

AzərTAc