Bakı şəhərində yerləşən dövlət ümumtəhsil müəssisələrində fəaliyyət göstərən müəllimlərin bilik və səriştəsinin sınaq qiymətləndirilməsinə başlanılmışdır.

Təhsil Nazirliyindən AzərTAc-a bildirmişlər ki, sınaq qiymətləndirilməsində iştirak edən müəllimlərin rahatlığının təmin olunması üçün seçilmiş mərkəzlərdə hər cür şərait yaradılmışdır.

İyunun 10-da rus dili və ədəbiyyat (rus bölməsində), ibtidai sinif, təsviri incəsənət və rəsmxətt müəllimlərinin sınaq qiymətləndirilməsi aparılmışdır.

İyunun 11-də riyaziyyat, Azərbaycan dili və ədəbiyyat (rus bölməsində Azərbaycan dili daxil olmaqla), iyunun 12-də ingilis dili, informatika, tarix, gənclərin çağırışaqədərki hazırlığı, biologiya, iyunun 13-də isə fizika, coğrafiya, kimya, musiqi, fransız dili, fiziki tərbiyə, əmək hazırlığı, alman dili, rus dili (Azərbaycan bölməsində) müəllimlərinin bilik və bacarıqları yoxlanılacaqdır.

İmtahanlar Bakı şəhərində 4 zona üzrə məktəblərdə, 2 növbədə (saat 10.00-dan 12.00-dək, 15.00-dan 17.00-dək) keçiriləcəkdir.

Bu məqsədlə 30 mərkəz müəyyən edilmişdir.

Sınaq qiymətləndirilmədə Bakı şəhəri üzrə, ümumilikdə, 357 məktəbin 30 min 70 müəlliminin iştirakı gözlənilir.

Sınaq qiymətləndirilməsi Bakı şəhərinin bütün ümumtəhsil məktəblərinin müəllimlərini əhatə edəcəkdir.