Sənaye sahələri ilə ali təhsil müəssisələri arasında əlaqələr daha da genişlənməli və sənaye müəssisələri kadr hazırlığında bilavasitə iştirak etməlidir. Təhsil Nazirliyindən aldığımız məlumatda bildirilir ki, bunu təhsil naziri Mikayıl Cabbarov “Bakıeletrikşəbəkə” ASC ilə birgə təşkil edilmiş “Eleketroenergetikada kadr problemləri - Gələcəyə baxış” adlı konfransda demişdir.

Nazirin sözlərinə görə, hazırda təhsilin keyfiyyəti və iqtisadiyyatın inkişafının mövcud tələbləri arasında fərqin aradan qaldırılması üçün sənaye sahələri ilə ali təhsil sistemi arasında sıx əməkdaşlığın qurulması zərurətə çevrilmişdir: “Xüsusi diqqət təhsil alanların istehsalat təcrübəsinə, birbaşa onların gələcək iş yerləri ilə əlaqəsinə yönəlməlidir. İstehsalat təcrübəsinin düzgün təşkili və onun nəticələri həm işəgötürən, həm də tələbə üçün gələcək iş fəaliyyəinə dair düzgün seçim etməsi baxımından mühüm faktordur. Eyni zamanda, istehsalat təcrübəsi təhsil müəssisəsi üçün verdiyi təlimin nəticələrinin kənardan ölçülməsi alətinə çevrilməli və tədris müəssisənin təkmilləşdirilməsi istiqamətlərini müəyyən etməlidir”.

M.Cabbarov qeyd etmişdir ki, ali təhsilin və bütövlükdə kadr hazırlığının keyfiyyəti əhəmiyyətli dərəcədə təhsil proqramının dövlət standartlarının məzmunundan asılıdır. Təhsil Nazirliyi hazırda təhsil proqramlarının dövlət standartlarını yeniləşdirərək təkmilləşdirilməsini həyata keçirir. Bu məqsədlə Təhsil Nazirliyi işəgötürənlərlə, sənaye müəssisələri, dövlət qurumları ilə müvafiq işlər görür və müvafiq dövlət strukturlarına müraciət hazırlamışdır: “Sənaye müəssisələrinin real təklifləri əsasında hazırlanacaq yeni təhsil proqramları əsasında aparılacaq tədris müasir tələblərə cavab verən kadr hazırlığını təmin etməyə zəmin yaradacaq”.

Samirə ƏLİYEVA, “Xalq qəzeti”