Neft kadrları hazırlanması sahəsində dünyaca məşhur Azərbaycan Dövlət Neft Akademiyası 94 illik fəaliyyəti dövründə dünyanın 103 ölkəsi üçün on minlərlə yüksək ixtisaslı mütəxəssis yetişdirmişdir. Bu ənənə bu gün də yüksək səviyyədə davam etdirilir.

Akademik əməkdaşlığın formalarından biri də tələbələrin təhsilin bütün pillələri üzrə hazırlanması üçün ADNA-ya məqsədyönlü göndərilməsi barədə xarici təhsil müəssisələri və neft şirkətləri ilə müqavilələrin bağlanmasıdır. Bu imkandan Dunindəki Çin Neft Universiteti, Pekindəki “SİNOPEK” Neft-Kimya Korporasiyası, Hanoydakı “Petrovietnam” Neft-qaz şirkəti və digər təşkilatlar fəal istifadə edirlər. Çində 2 mindən artıq dövlət ali məktəbinin olmasına baxmayaraq, hazırda bu ölkənin Yantszı Universiteti ilə də birgə tələbə hazırlığı barədə ilkin danışıqlar aparılır.

Bu günlərdə Çin Xalq Respublikasının Karamay şəhərinin və bu şəhərdə yerləşən Karamay Peşə-Texniki İnstitutunun səlahiyyətli nümayəndə heyəti ADNA-da olmuşdur. Hələ uzaq 1936-cı ildə Bakıdan olan mütəxəssislərin köməyi ilə Çinin bu rayonunda başlanan neft axtarışları 1955-ci ildə - xalq hakimiyyəti dövründə uğurla başa çatmışdı. 1958-ci ildə isə Karamay şəhərinin əsası qoyuldu. Hazırda fəaliyyət göstərən neft mədənləri ilə yanaşı şəhər, həmçinin, Çinin iki nəhəng neft emalı zavodu və burada sərbəst iqtisadi zonanın yaradılması barədə layihə ilə məşhurdur. 1956-cı ildən fəaliyyət göstərən Karamay Peşə-Texniki İnstitutu strukturu və istiqamətinə görə ADNA-ya oxşayır və bu illər ərzində ÇXR-in neft sənayesi üçün 40 minə yaxın mütəxəssis yetişdirmişdir.

Ölkənin sürətlə inkişaf edən sənayesinin tələblərini nəzərə alan Çin hökuməti Karamay Peşə-Texniki İnstitutunun bazasında yeni neft universitetinin yaradılması barədə qərar qəbul etmişdir. Bu ali məktəbin yaradılmasında ADNA-nın təcrübə və imkanlarından bəhrələnmək məqsədilə, şəhər və institut rəhbərliyi müvafiq xahişlə ADNA-ya müraciət etdi və bundan sonra hər iki ali məktəbin kollektivi əməkdaşlığın həyata keçirilməsi yollarının müzakirəsinə başladılar. Çin nümayəndə heyətini qəbul edən ADNA rektoru, akademik Siyavuş Qarayev rəhbərlik etdiyi təhsil ocağının tarixi və nailiyyətləri, keçmiş SSRİ-də, eləcə də xaricdə müvafiq profilli ali məktəblərin yaradılmasındakı rolu, hazırkı imkanları və potensialı barədə müfəssəl məlumat verdi, əməkdaşlığın praktiki reallaşması yolları haqqında danışdı. Rektor xüsusi olaraq qeyd etdi ki, çoxsaylı təltifləri arasında Çin Neft Universitetinin fəxri professoru adını qürurla daşıyır.

Səfər çərçivəsində hər iki tərəfin imzaladığı razılaşmada çinli tələbə və mütəxəssislərin ADNA-da təhsili, pedaqoji kadrların hazırlanmasına kömək göstərilməsi, azərbaycanlı müəllimlərin Karamaya ezam edilməsi, müştərək elmi tədqiqatların aparılması nəzərdə tutulmuşdur. Qonaqlara burada təhsil alan çinli tələbələrlə söhbət aparmaq, ADNA-nın tədris laboratoriyaları və auditoriyaları, elmi şöbələri, muzeyləri ilə tanış olmaq imkanı yaradıldı. “Fəxri qonaqlar” kitabında onlar ürək sözlərini yazaraq, çinli vətəndaşların təhsili üçün yaradılmış şəraiti, tədrisin keyfiyyətini və laboratoriyaların təchizat səviyyəsini, Azərbaycan xalqının mehribanlıq və qonaqpərvərliyini yüksək qiymətləndirdilər.

Sentyabr ayında ADNA-ya Çin Xalq Respublikasının Sintszyan-Uyğur Muxtar Vilayətinin Karamay şəhərindən ilk tələbələrin gəlişi gözlənilir.

Paşa ƏMİRCANOV, “Xalq qəzeti”