Respublikanın bütün ali məktəblərində olduğu kimi, Gəncə Dövlət Universitetində də məzun günü keçirilib.

Tədbirdə təbrik nitqi ilə çıxış edən universitetin rektoru, professor Yusif Yusibov əvvəlcə Azərbaycanın müəllim və tələbə kollektivi üçün yaradılmış gözəl şəraitə görə ölkə Prezidenti İlham Əliyevə minnətdarlığını bildirərək dedi: Dörd il təhsil aldığınız doğma universitetinizdən bu gün ayrılırsınız. Kimi təhsilini magistraturada davam etdirəcək, kimi yeni iş yerlərinə gedəcək, kimi də hərbi xidmətə yollanacaqdır. Harada təhsilinizi davam etdirəcəyinizdən, işləyəcəyinizdən asılı olmayaraq, əminəm ki, doğma Vətənimizə ləyaqətli vətəndaş olacaqsınız. Sizlərə həyatın enişli-yoxuşlu yollarında çətinliklərə sinə gərib irəliləməyinizi, bütün sınaqlardan üzüağ çıxmağınızı, ali təhsil aldığınız universitetin adını şərəflə doğrultmağınızı arzulayıram.

Universitetin prorektoru, dosent Asif Cavadov məzunları təbrik edərək bildirdi ki, bu ilin may ayında, ulu öndər Heydər Əliyevin anadan olmasının 91-ci ildönümü münasibətilə respublika tələbələrinin bədii yaradıcılıq festivalında universitetin  kollektivi yüksək nailiyyətlər qazanmışlar.

GDU-nun rektoru, professor Yusif Yusibov bu nailiyyətlərin qazanılmasında böyük əməyi olan, musiqi fənləri kafedrasının müdiri, professor Sevda Qurbanəliyevaya rektorluğun fəxri fərmanını, qalib tələbələrə isə Təhsil Nazirliyinin və Ali Təhsil İşçiləri Həmkarlar İttifaqı Komitəsinin diplom və sertifikatlarını təqdim etdi.

Günün ikinci yarısında “Məzun gecəsi” şəhərin möhtəşəm “İmperial” şadlıq sarayında davam etdirildi.

Elçin ABBASOV, “Xalq qəzeti”