Azərbaycan Turizm İnstitutunda 28 May Respublika Günü ilə bağlı professor-müəllim heyətinin və tələbələrin iştirakı ilə keçirilmiş tədbiri ali təhsil ocağının rektoru, tarix elmləri doktoru, professor Cəfər Cəfərov giriş sözü ilə açmış, 96 il əvvəl – 1918 ci il mayın 28- də müsəlman Şərqində ilk demokratik respublikanın yaranmasını “xalqımızın şərəf tarixi, böyük dövlətçilik ənənələrinə sədaqətin sübutu”  kimi dəyərləndirmişdir.

O, xalqımızın müstəqillik salnaməsinə, dövlətçilik ənənələrinin inkişafına verdiyi mühüm töhfələrdən söz açmış və bu günün beş min illik dövlətçilik tarixinin ən parlaq səhifələrini təşkil etdiyini xüsusi diqqətə çatdırmışdır.

Respublika Gününə həsr olunmuş tədbirin sonunda ATİ Tələbə Gənclər Təşkilatı üzvlərinin təşəbbüsü ilə təşkil olunmuş “ 28 kadr” adlı sərbəst mövzulu fotoşəkillərə ictimai baxış keçirilmişdir. Tədbir tələbə-fotoqraflara sertifikatların və xatirə hədiyyələrinin təqdimatı ilə başa çatmışdır.

Z. BƏŞİRQIZI,

“Xalq qəzeti”