Tələbə və məzunların əmək bazarına inteqrasiyası məqsədilə bu günlərdə Azərbaycan Texniki Universitetində keçirilən aktiv məşğulluq tədbirində 160 nəfər tələbə və məzuna boş (vakant) iş yerlərinə göndəriş verilmişdir.  Həmin iş yerlərindən 22-si dövlət, 138-i qeyri-dövlət (özəl) sektoruna aiddir. 

Əmək və Əhalinin Sosial Müdafiəsi Nazirliyi yanında Dövlət Məşğulluq Xidməti tərəfindən təşkil olunan tədbirdə müasir tələblərə cavab verən ixtisaslı kadrların seçiminin aparılması üçün 705 nəfər tələbə və məzun barədə şəxsi məlumatlar (CV) işəgötürənlərə təqdim edilmişdir. Tədbir zamanı 45 nəfər şəxs yeni peşələrə yiyələnmələri məqsədilə peşə hazırlığı kurslarına cəlb olunmaları üçün qeydə alınmışlar.

Nazirliyin ictimaiyyətlə əlaqələr şöbəsindən bildirmişlər ki, tədbirdə 87-si özəl sektora aid 116 müəssisə tərəfindən vakansiyalar bildirilmişdir. Ümumilikdə isə toplantıda 1245 boş (vakant) iş yeri tələbə və məzunların seçiminə təqdim edilmişdir ki, onlardan 735-i özəl müəssisələrə aid olmuşdur.

Tədbirdə Azərbaycan Memarlıq və İnşaat Universitetinin tələbə və məzunları da iştirak etmişlər. Digər ali təhsil ocaqlarında da məşğulluq xidməti tərəfindən belə tədbirlərin təşkili planlaşdırılır.

Z. BƏŞİRQIZI,

“Xalq qəzeti”