Azərbaycanın Qırğız Respublikasındakı səfirliyinin təşəbbüsü ilə “Heydər Əliyev – həmişə zamandan irəlidə” kitabı rus dilində nəşr edilmişdir.

Topluya 2013-cü il aprelin 25-də və dekabrın 10-da Bişkek şəhərində keçirilmiş “ Heydər Əliyev - həmişə zamandan irəlidə ” mövzusunda beynəlxalq konfransın və ulu öndərin xatirəsinə həsr olunan “dəyirmi masa”nın materialları daxil edilmişdir.

Kitab Azərbaycanın Qırğız Respublikasındakı səfiri Hidayət Orucovun konfransdakı açılış nitqi ilə başlayır.

Nəşrdə Hidayət Orucov hər iki tədbirdəki çıxışları, həmçinin Qırğız Respublikası Prezidenti Aparatı rəhbərinin müavini, xarici siyasət şöbəsinin müdiri Sapar İsakov, ölkə parlamenti - Jokorku Keneşinin deputatı, parlamentdəki Qırğızıstan-Azərbaycan dostluq qrupunun rəhbəri Kurmanbek Dıykanbaev, ölkə Milli Elmlər Akademiyasının müxbir üzvü, Tarix və Mədəni İrs İnstitutunun direktoru, tarix elmləri doktoru, professor Djeniş Djunuşaliyev, Qırğız-Türk “Manas” Universitetinin rektoru, professor Səbahəddin Balçı, Ukraynanın və Özbəkistanın Qırğızıstandakı səfirləri Vladimir Solovey, Komil Rəşidov, akademik Turar Koyçuyev, İşenalı Arabayev adına Qırğız Dövlət Universitetinin rektoru Tolobek Abdıraxmanovun məruzələri və çıxışları yer almışdır.

Topluya, həmçinin fəlsəfə elmləri doktoru, professor Kadıralı Konkobayevin, Qırğız-Rusiya Slavyan Universitetinin müəllimi Məlahət Məmmədovanın, “Qırğız Tuusu” qəzetinin baş redaktoru Bakıtbek Orunbekovun, Qırğızıstanın Əməkdar Həkimi, tibb elmləri doktoru, professor Zakir Qəmərlinin və digər tanınmış alimlərin, ictimai xadimlərin ulu öndər haqqında çıxışları daxil edilmişdir.

Nəşrin fotoalbom hissəsinə Heydər Əliyevin həyat və fəaliyyətini əks etdirən fotoşəkillər daxil edilmişdir.

Kitab Hidayət Orucovun ümumi redaktəsi altında nəşr olunmuşdur.

Toplunun redaktoru Qırğızıstan-Rusiya Slavyan Universitetinin dünya dilləri kafedrasının müdiri, filologiya elmləri namizədi Lira Sulaymanovadır.

Kitab yüksək bədii tərtibatla, nəfis şəkildə çap edilmişdir.

Qulu KƏNGƏRLİ,

AzərTAc-ın xüsusi müxbiri

Bişkek