Azərbaycan Turizm İnstitutu ilə AMEA-nın Folklor İnstitutu arasında əməkdaşlığa dair memorandum imzalanmışdır. Bu münasibətlə keçirilən ikitərəfli görüşü Azərbaycan Turizm İnstitutunun rektoru, tarix elmləri doktoru, professor Cəfər Cəfərov açmışdır.

Rektor turizm ixtisaslı kadr hazırlığının əsas ünvanı kimi tanınmış ATİ və xalqın zəngin mənəvi dünyasının öyrənilməsi missiyasını hədəfləyən Folklor İnstitutu arasında əsası qoyulan əməkdaşlığın faydalı olacağını mərasim iştirakçılarının diqqətinə çatdırmışdır. Elm-təhsilin üzvi şəkildə əlaqələndirilməsinin əhəmiyyət və gözləntilərini detallı şərh etmişdir. O, zəngin mədəniyyətimizi araşdırmaqla kifayətlənməyib, onun geniş təbliğinə ciddi səy göstərən ziyalıların ATİ-yə gəlişini, milli mənliyimizlə bağlı fikir mübadiləsi aparmaqda maraqlı olmalarını yüksək dəyərləndirmişdir. “Natiq ölkənin turizm imkanlarını tanıtmaq, təbliğ etmək üçün əvvəl özümüzü tanımalıyıq”– fikrini xüsusi vurğulayaraq çıxışını tamamlamışdır.  AMEA Folklor İnstitutunun direktoru, filologiya elmləri doktoru Muxtar İmanov spesifik sahə üzrə kadr hazırlığına dövlət səviyyəsində xüsusi qayğı göstərildiyini bir daha diqqətə çatdırmışdır. Rəhbərlik etdiyi elm müəssisəsində adət-ənənə, davranış, oyun, yarış, tamaşa, rəqs, musiqi və söz haqqında yazılan və yazılmayan dəyərlərin qorunub saxlandığını bildirməklə bərabər, çoxcildli antologiyaların, tematik elmi topluların, dissertasiya və monoqrafiyaların, tərcümə əsərlərinin işıq üzü gördüyündən də söz açmışdır.

Görüşdə elm-təhsil müəssisələrinin rəhbərləri bildirmişlər ki, imzalanacaq sənəddə Azərbaycan xalqının milli-mənəvi sərvətlərinin, qeyri-maddi mədəni irsinin, tarixi-etnoqrafik dəyərlərinin toplanması, tədqiqi və bu istiqamətdə əldə edilmiş nəticələrdən ölkənin turizm imkanlarının genişləndirilməsində, Azərbaycanın dünya turizm bazarına inteqrasiyasında, sülhsevər və qonaqpərvər xalqımızın gözəl ənənələrinin təbliğində səmərəli istifadə edilməsi məsələləri öz əksini tapmışdır. Sənəddə eyni zamanda, Azərbaycanda yaşayan azsaylı xalqların folklor ənənələrini, yerli şəraiti, ekoloji imkanları nəzərə alaraq etnoqrafik və dini turizmin inkişafı ilə bağlı birgə tədbirlərin təşkili, xalq inancları, inam yerləri və ziyarətgahlarla bağlı öyrənilməsi, toplanması, nəşri və tədqiqi, bu istiqamətdə yerli və beynəlxalq turizm marşrutlarının təşkil olunması ilə bağlı təkliflərin hazırlanması, turizmin inkişafı ilə bağlı yerli imkanların öyrənilməsi, elmi tədqiqatların aparılması, turizm kadrlarının hazırlanması prosesində mövcud imkanlardan qarşılıqlı səmərəli istifadə edilməsi, birgə elmi konfransların, seminarların, ezamiyyələrin və digər tədbirlərin təşkili nəzərdə tutulur.

Bundan əlavə, memorandumun praktik icrasını təşkil etmək məqsədilə hər iki tərəfdən mütəxəssislər qrupunun yaradılması qərara alınmışdır.

Sonra C. Cəfərov və M. İmanov əməkdaşlıq memorandumunu imzalamışlar.

Tədbir çərçivəsində ATİ və Folklor İnstitutunun birgə təşkilatçılığı ilə “Azərbaycan əfsanələr diyarı” mövzusunda konfrans keçirilmişdir. Konfransda AMEA Folklor İnstitutunun şöbə müdirləri N.Rəhimbəyli, Ə. Şamil, E. Məmmədli, F. Bayat, ATİ-nin kafedra müdiri İ. Əliyev, müəllimlərdən S. Kərimova və G.Qafarova maraqlı təkliflərlə çıxış etmiş, yeni qurulacaq əlaqələrin Azərbaycan folklorunun turizm vasitəsilə tanıdılması işinə böyük töhfələr verəcəyini bildirmişlər.

Z. BƏŞİRQIZI,

“Xalq qəzeti”