Bu il Masallı məktəblərini bitirən məzunlardan 650 nəfəri ali məktəblərə qəbul üçün sənəd vermiş, onlardan 215-i tələbə adına layiq görülmüşdür.
Yüksək nəticə əldə edərək tələbə adını qazanmış məzunlarla rayon icra hakimiyyətində keçirilən görüşün iştirakçıları əvvəlcə ulu öndər Heydər Əliyevin abidəsini ziyarət etmiş, önünə çiçək dəstələri düzmüşlər. Daha sonra məzunlar Heydər Əliyev muzeyində ümummilli liderin şərəfli ömür yolu ilə tanış olmuşlar.
Tədbiri Masallı Rayon İcra Hakimiyyətinin başçısı Qəzənfər Ağayev açaraq qəbul imtahanlarında yüksək bal toplamış məzunları təbrik etmiş, onlara təhsillərində uğurlar diləmişdir. Natiq təhsilə dövlət qayğısından bəhs etmiş, ölkə rəhbəri cənab İlham Əliyevin Azərbaycanda təhsilin inkişafına daim ciddi önəm verdiyini vurğulamışdır. O əmin olduğunu bildirmişdir ki, tələbə adını qazanan gənclər bir neçə ildən sonra ölkəmizin hərtərəfli hazırlığa malik mütəxəssisləri olacaqlar.
Təhsil şöbəsinin müdiri Astan İbişov, Digah orta məktəbinin direktoru Nailə Əsədullayeva, Qəhrəman İsmayılov adına Şərəfə kənd orta məktəbinin direktoru Taleh Əkbərov, Bakı Dövlət Universitetinin II kurs tələbəsi, Prezident təqaüdçüsü Nigar Əliyeva, Azərbaycan Dövlət Pedaqoji Universitetinin tələbəsi Nərmin Adilzadə və başqaları təhsilə göstərilən diqqət və qayğıya görə minnətdarlıqlarını bildirmişlər.
Tədbirdə ali məktəblərə qəbulda yüksək nəticə əldə etmiş 34 tələbəyə rayon icra hakimiyyəti başçısının pul mükafatı və fəxri fərmanlar təqdim olundu. Üç tələbəyə isə ali təhsil alacağı müddətdə rayon rəhbərliyinin aylıq təqaüdləri təyin edilmişdir.
Sonra tələbə adını qazanan gənclər rayon rəhbərliyi ilə xatirə şəkilləri çəkdirmişlər.
Tədbir maraqlı konsert proqramı ilə başa çatmışdır.

Ə.Əliyev, "Xalq qəzeti"