Avqustun 20-də Rusiyanın Azərbaycandakı səfirliyində Rusiya Federasiyasının dövlət ali məktəblərində təhsil almaq üçün təqaüdə layiq görülmüş azərbaycanlı tələbələrin yolasalma mərasimi keçirilmişdir.
Mərasimdə çıxış edən Rusiyanın Azərbaycandakı səfiri Vladimir Doroxin Rusiyaya təhsil almaq üçün gedən gəncləri təbrik etmiş, onlara uğurlar arzulamışdır. Diplomat əmin olduğunu bildirmişdir ki, təhsili başa çatdırdıqdan sonra gənclər yaxşı mütəxəssislər kimi Azərbaycanın rifahı, Azərbaycan-Rusiya münasibətlərinin bundan sonra da inkişaf etməsi naminə çalışacaqlar.
V.Doroxin Rusiya ali məktəblərinin təqaüdünü alacaq namizədlərin seçilməsində, onların Rusiya Federasiyasında təhsil almaq üçün yola salınmasının təşkilində göstərdikləri köməyə görə Azərbaycan Təhsil Nazirliyinə, Tələbə Qəbulu üzrə Dövlət Komissiyasına, Bakıda həmvətənlər təşkilatlarının rəhbərlərinə təşəkkürünü bildirmişdir.
Səfir vurğulamışdır ki, Azərbaycanda Rusiyada təhsil almağa həmişə böyük maraq olmuşdur. Məsələn, əgər 2007-ci ildə Rusiya ali məktəblərinin təqaüdünə 178 azərbaycanlı layiq görülmüşdüsə, 2008-ci ildə bu göstərici 198 nəfərə, 2009-cu ildə 284 nəfərə, bu il isə 302 nəfərə çatmışdır. 2009-2010-cu tədris ilində Rusiya ali məktəblərində 5855 Azərbaycan vətəndaşı təhsil almışdır, onların 772 nəfəri Rusiya federal büdcəsi hesabına oxumuşdur.
Diplomat demişdir: "Rusiyanın ali məktəbləri Azərbaycanın xaricdə ixtisaslı kadr hazırlığı mərkəzlərindən birinə çevrilmişdir. Ölkəmiz Azərbaycan ilə təhsil sahəsində səmərəli əməkdaşlığı davam etdirməyə hazırdır. Bu əməkdaşlığın əsasını Rusiya ali məktəblərinin nüfuzlu olması, rus dilinin Azərbaycanda geniş yayılması və Rusiya-Azərbaycan münasibətlərinin dostluq xarakteri daşıması təşkil edir".
Yolasalma mərasimi maraqlı konsert proqramı ilə başa çatmışdır.