Aprelin 21-də Bakı Dövlət Universitetində (BDU) görkəmli alim, əməkdar hüquqşünas, BDU-nun hüquq fakültəsinin cinayət hüququ və kriminologiya kafedrasının müdiri, hüquq üzrə elmlər doktoru, professor Firudin Səməndərovun anadan olmasının 75, elmi-pedaqoji fəaliyyətinin 50 illiyinə həsr edilmiş tədbir keçirilmişdir. 

Müvafiq dövlət qurumları nümayəndələrinin, tanınmış alim və mütəxəssislərin, tələbələrin iştirak etdikləri tədbirdə BDU-nun rektoru, Milli Məclisin deputatı, akademik Abel Məhərrəmov, hüquq fakültəsinin dekanı, professor Əmir Əliyev görkəmli alim və pedaqoq, professor Firudin Səməndərovun səmərəli elmi-pedaqoji fəaliyyətindən, qazandığı  nailiyyətlərdən, yüksək ixtisaslı kadrların hazırlanmasındakı xidmətlərindən danışmışlar.

Qeyd olunmuşdur ki, F.Səməndərov 1966-cı ildə Azərbaycan Dövlət Universitetinin (indiki Bakı Dövlət Universiteti) hüquq fakültəsini bitirmiş, burada cinayət hüququ kafedrasının aspirantı olmuşdur. O, 1970-ci ildə “Qətl cinayətlərini doğuran halların və davranış motivinin cəza təyininə təsiri” mövzusunda namizədlik, 1995-ci ildə “Cinayət hüququ şüur və cinayət hüquq yaradıcılığı” mövzusunda doktorluq dissertasiyalarını müdafiə etmişdir. Alimə   professor elmi adı verilmişdir.

1969-cu ildən universitetin cinayət hüququ kafedrasında pedaqoji fəaliyyətə başlayan F.Səməndərov az müddətdən sonra  burada baş müəllim, dosent vəzifələrində çalışmış, 1985-1989-cu illərdə hüquq fakültəsinin dekanı, 1992-1993-cü illərdə Bakı Dövlət Universitetinin rektoru olmuşdur. 1995-ci ildən BDU-nun cinayət hüququ və kriminologiya kafedrasının müdiridir.

Professor F.Səməndərov 15-dən çox dərslik, dərs vəsaiti və monoqrafiyanın müəllifidir. Müxtəlif elmi nəşrlərdə onun 100-dən artıq elmi məqaləsi dərc edilmişdir. Alimin “Cinayət hüququ. Ümumi hissə” dərsliyi 2002-ci ildə Azərbaycan Respublikası Kitabsevərlər Cəmiyyətinin mükafatına layiq görülmüşdür. 2013-cü ildə həmin dərslik 5-ci dəfə nəşr edilmişdir. 

Alimin yüksək ixtisaslı mütəxəssislərin, elmi kadrların hazırlanmasında mühüm xidmətləri olmuşdur.

Professor F.Səməndərovun iştirakı və redaktorluğu ilə ilk dəfə milli dildə hazırlanan “Azərbaycan Respublikasının Cinayət Məcəlləsinin Kommentariyası” mütəxəssis və tədqiqatçılar üçün çox əhəmiyyətli nəşrdir.

Professor F.Səməndərov 1995-ci ildən Azərbaycan Respublikasının Prezidenti yanında Hüquqi İslahatlar Komissiyasının üzvüdür. O, eyni zamanda, Respublika Ali Məhkəməsi yanında Elmi Məsləhət Şurasının, Azərbaycan Respublikasının Baş Prokurorluğu yanında Elmi-Metodik Şuranın üzvüdür, Azərbaycan Respublikası Təhsil Nazirliyinin Hüquq üzrə Elmi-Metodiki Şurasının sədridir.

Alim beynəlxalq elmi konfranslarda məruzələr etmişdir.   

Tədbirdə Azərbaycan Respublikası Konstitusiya Məhkəməsinin, Təhsil Nazirliyinin və Ədliyyə Nazirliyi Penitensiar Xidmətinin yubilyara təbrikləri çatdırılmışdır.

Milli Aviasiya Akademiyasının professoru İbrahim Quliyev, AMEA-nın Riyaziyyat və Mexanika İnstitutunun direktoru, professor Misir Mərdanov, AMEA-nın müxbir üzvü Tofiq Hacıyev, digər alim və mütəxəssislər də professor Firudin Səməndərovun elmə, təhsilə verdiyi töhfələrdən bəhs etmiş, ona yeni nailiyyətlər arzulamışlar.  

Professor Firudin Səməndərov Azərbaycan Prezidenti İlham Əliyevin apardığı siyasətin uğurlu nəticələrindən danışmış, tədbirin təşkilatçılarına və iştirakçılarına təşəkkürünü bildirmişdir.

AzərTAc