Aprelin 17-də “ADA” Universiteti ilə Bakı Dövlət Universitetinin nəzdində fəaliyyət göstərən Konfutsi İnstitutu arasında əməkdaşlıq haqqında saziş imzalanmışdır.

Sazişi “ADA” Universitetinin rektoru, xarici işlər nazirinin müavini Hafiz Paşayev, Konfutsi İnstitutunun direktorları - Çin tərəfdən xanım Hu Fenhua və Azərbaycan tərəfdən Oqtay Cəlilbəyli imzalamışlar.

Sənədin imzalanmasında məqsəd “ADA” Universitetinin  tələbələri tərəfindən Çin dilinin öyrənilməsinin təşkili, dil və mədəniyyətinin təbliğ edilməsidir.

Sazişdə Konfutsi İnstitutunda fəaliyyət göstərən Çin dili müəllimlərinin “ADA”-da fəaliyyəti, bu dilin təbliği ilə əlaqədar bir sıra müxtəlif mədəni tədbirlərin, dil kursları üzrə yay və qış məktəblərinin təşkili, tələbələrin dil müsabiqələrinə hazırlığına kömək göstərilməsi, uğur qazanan tələbələrin Çində təhsil və ya qısa təcrübə proqramları keçmələri, ölkənin aparıcı universitetlərinin müəllim və professor heyəti ilə qısamüddətli mübadilə proqramlarının həyata keçirilməsi nəzərdə tutulmuşdur. Bundan əlavə, əməkdaşlığın müxtəlif aspektlərini müzakirə etmək üçün “ADA” Universitetinin nümayəndə heyəti iyun ayında Çinin müxtəlif universitetlərinə səfər edəcəkdir.

AzərTAc