Aprelin 16-da Azərbaycan Dillər Universitetində (ADU) Milli Televiziya və Radio Şurasının üzvü, “Kaspi” Təhsil Mərkəzinin və “Kaspi” qəzetinin  təsisçisi, tanınmış şairə, filologiya üzrə fəlsəfə doktoru

Sona Vəliyeva ilə görüş keçirilmişdir.

AzərTAc xəbər verir ki, görüşdə şairənin qələm dostları, ADU-nun rektoru, Milli Məclisin deputatı, professor Səməd Seyidov, universitetin professor-müəllim heyəti və tələbələr iştirak etmişlər.  

Tədbirdə çıxış edən ADU-nun kafedra müdiri, professor Fəridə Səfiyeva şairənin yaradıcılığı haqqında məlumat vermiş, “Kaspi” qəzeti - “Kaspi” Təhsil Mərkəzinin layihəsi əsasında İstanbulda “Hüseyn Cavid. Əsərləri” kitabının nəşr olunduğunu qeyd etmişdir. O, bildirmişdir ki, oxucular Sona Vəliyevanı  maarifçi, ziyalı, şair, alim, xalqını və dövlətini çox sevən bir qadın kimi tanıyırlar. F.Səfiyeva şairənin yaradıcılığının, elmi işlərinin və peşə fəaliyyətinin vahid bir sistem təşkil etdiyini və bu sistemin bütünlüklə azərbaycançılıq  ideologiyasına  xidmət etdiyini diqqətə çatdırmışdır. O, Sona Vəliyevanın azərbaycançılıq ideologiyasının əsas tədqiqatçılarından və yorulmaz təbliğatçılarından olduğunu vurğulamışdır. Kafedra müdiri demişdir ki,  S.Vəliyevanın  “Azərbaycançılıq ideologiyasının təşəkkülü və tarixi inkişaf yolu” əsərinin azərbaycançılığın təbliği sahəsində özünəməxsus rolu vardır.

Tədbirdə nümayiş olunan videoçarxda Sona Vəliyevanın həyat və yaradıcılığından bəhs edilməklə yanaşı, qələm yoldaşlarının tanınmış şairə haqqında dəyərli fikirləri də yer almışdır.

Bildirilmişdir ki, Sona Vəliyevanın kitablarını hissiz, həyəcansız oxumaq olmur. Onun şeirləri insanda xoş ovqat yaradır. Şairənin şeirləri hay-küydən, pafosdan uzaqdır. Sona Vəliyevanın şeirlərində poetik məziyyət, obrazlılıq, hadisələrə özünəməxsus münasibəti vardır.

Müəllifin “Arazbari” kitabı əslində öz ruhunun, iç dünyasının şəklidir. Bu kitabda toplanmış  şeirlər təkcə bir ananın, bir qadının, bir vətəndaşın duyğularının təcəssümü deyildir. Xalqının azadlığını, müstəqilliyini hər şeydən uca tutanların, sevənlərin qəlb çırpıntılarının kağız üzərində əksidir. Şairənin bütün şeirlərində əsl kişi qeyrəti görünür, Vətən narahatlığı, millət ağrısı duyulur.

Sona Vəliyevanın şeirləri süni bər-bəzəkdən, gözqamaşdırıcı parıltılardan uzaqdır. Bu şeirlərdə oxucunu düşünməyə vadar etmək hissi daha güclüdür. Azərbaycanın parçalanması, Güney - Qüzey ayrılığı, Qarabağ ağrısı Sona Vəliyevanın yaradıcılığında ana xətt kimi keçir.

Tədbirdə tələbələrin iştirakı ilə şairənin sözlərinə bəstələnmiş mahnılar ifa olunmuş, şeirlərindən parçalar səsləndirilmişdir.

Sonda çıxış edən Sona Vəliyeva tədbirin təşkilatçılarına və iştirakçılarına təşəkkürünü bildirmişdir.

Yaradıcılığının əsas cəhətlərindən danışan S.Vəliyeva demişdir ki, Azərbaycan xalqı öz dilini və mədəniyyətini bütün assimilyasiya basqılarından qoruyaraq bu günə kimi yaşada bilmişdir. Dil millətin var olmasında ən mühüm amildir.

 Sona Vəliyeva Azərbaycan dilinin inkişafının, azərbaycançılıq ideyasının müstəqilliyimizin bərpasından sonra ümummilli lider Heydər Əliyev tərəfindən daha da inkişaf etdirilərək yalnız Azərbaycan Respublikasının deyil, bütün dünya azərbaycanlılarının ideologiyası səviyyəsinə yüksəldiyini diqqətə çatdırmışdır.