“ADA” Universitetində Avropa İttifaqı əlaqələrinə yönələn “Azərbaycan Respublikasında Dövlət Qulluğunda Avropa İttifaqı (Aİ) məsələlərinə aid təlim sisteminə dəstək və Aİ məsələləri üzrə mərkəzin yaradılması” adlı ikiillik layihənin həyata keçirilməsinə başlanılmışdır.

Universitetdən AzərTAc-a bildirmişlər ki, aprelin 9-da layihənin rəsmi açılışı keçiriləcəkdir. Tədbirdə xarici işlər nazirinin müavini, “ADA” Universitetinin rektoru Hafiz Paşayev, Dövlət Qulluğu Məsələləri üzrə Komissiyanın sədri Bəhram Xəlilov, Avropa İttifaqının Azərbaycandakı səfiri Malena Mard və digər qonaqlar iştirak edəcəklər.

Tədbirdə, həmçinin Dövlət Qulluğu Məsələləri üzrə Komissiya və Belçikanın Avropa Kolleci ilə anlaşma memorandumlarının imzalanması nəzərdə tutulur.

Layihə Belçikanın Avropa Kolleci ilə birgə Avropa İttifaqının maliyyə dəstəyi ilə həyata keçirilir. Layihənin əsas məqsədi hərtərəfli institutlaşdırma proqramı çərçivəsində “ADA” Universitetinə İnstitusional İslahat Planını həyata keçirməkdə dəstək olmaqdır.

 Layihə çərçivəsində dövlət qulluqçularına təlimlər keçirilməklə yanaşı, “ADA” Universitetində Avropa İttifaqı üzrə magistratura proqramının yaradılması,  Azərbaycan-Avropa İttifaqı əlaqələrinə həsr olunmuş  konfransların təşkili, o cümlədən tədris proqramının təkmilləşdirilməsi kimi işlər nəzərdə tutulur.