M.V. Lomonosov adına Moskva Dövlət Universitetinin Bakı filialının kimya fakültəsinin tələbələrinə “AzMeCo” şirkəti tərəfindən təyin olunmuş təqaüd təqdim edilmişdir.

Şirkətin mətbuat xidmətindən  bildirmişlər ki, tədbirdə universitetin müəllim heyəti və kimya fakültəsinin tələbələri iştirak etmişlər.

Moskva Dövlət Universitetinin Bakı filialının 2013-2014-cü tədris ilinin payız semestrinin və 2013-2014-cü tədris ili üçün universitetə qəbul imtahanlarının nəticələrinə əsasən, “AzMeCo” təqaüdünün qızıl dərəcəsinə Günay Yunusova, Milanə Ağayeva, Olqa Kuzminskaya, Səbinə Tahirova, təqaüdün gümüş dərəcəsinə isə Nigar Mədətli, Təbriz Həsənov, Nərmin Suvarlı, Səbinə Əmirova layiq görülmüşlər.

“AzMeCo” şirkətinin korporativ sosial məsuliyyət layihələrindən biri olan bu təqaüdün hədəfi ən yüksək hazırlıqlı və müvəffəqiyyətlə oxuyan tələbələrin təhsilini dəstəkləmək, eləcə də ölkəmizdə neft-kimya sahəsinin gələcəyi üçün peşəkar kadrlar yetişdirilməsinə töhfə verməkdir.

“AzMeCo” şirkətinin Direktorlar Şurasının sədri Nizami Piriyev tələbələrlə görüşdə ölkəmizdə neft-kimya sənayesinin inkişafına xüsusi əhəmiyyət verildiyini və bu sahədə yerli gənc kadrlara böyük ehtiyac olduğunu qeyd etmişdir. O, həmçinin bildirmişdir ki, “AzMeCo” təqaüdünə layiq görülən tələbələr təhsillərini başa vurandan sonra şirkətin Qaradağda yerləşən, regionda ilk metanol zavodunda işlə təmin olunmaq imkanı da qazanacaqlar. Bundan əlavə, universitetin III-IV kurslarında oxuyan təqaüdçülər “AzMeCo” zavodunda istehsalat təcrübəsi keçə biləcəklər.

Azərbaycan Metanol Şirkəti (AzMeCo) 2007-ci ildə yaradılmışdır. Şirkət neft-kimya layihələrinə sərmayə qoyur və Azərbaycanda iri layihələrin reallaşdırılmasını həyata keçirir. “AzMeCo” 2013-cü ildə özünün inşa etdiyi metanol zavodunu tamamlamış və istifadəyə vermişdir. Zavodun illik istehsal gücü 720 min tondur. Metanol zavodları kimya sənayesində ən təmiz və ekoloji cəhətdən zərərsiz hesab edilir.