Aprelin 5-də Tələbə Qəbulu üzrə Dövlət Komissiyasında (TQDK) 2014-2015-ci tədris ili üçün Azərbaycan Respublikasının ali təhsil müəssisələrinə və tam orta təhsil bazasında orta ixtisas təhsili müəssisələrinə qəbul imtahanlarında iştirak etmək üçün ərizə qəbulunun aparılması ilə bağlı mətbuat konfransı keçirilmişdir.

AzərTAc xəbər verir ki, konfransda çıxış edən TQDK-nın mətbuat xidmətinin rəhbəri Elnur Nağızadə ərizələrin qəbulunun aparılması qaydaları haqqında ətraflı məlumat vermişdir.

Qeyd olunmuşdur ki, ali təhsil müəssisələrinə və tam orta təhsil bazasında orta ixtisas təhsili müəssisələrinə bu il keçiriləcək qəbul imtahanlarında iştirak etmək üçün aprelin 1-dən ərizə qəbulu elan edilmişdir. Ərizələrin qəbulu internetlə elektron formada aparılır və aprelin 30-dək davam edəcəkdir. Öz elektron ərizələrini sənəd qəbulu komissiyalarında (SQK) təsdiq etdirməli olan abituriyentlər üçün SQK-lar aprel ayının 7-dən başlayaraq hər gün (şənbə və  bazar günləri istisna olmaqla) saat 9.00-dan 17.00-dək fəaliyyət göstərəcəkdir. Qəbul imtahanları əvvəlki illərin məzunları üçün may ayında, cari ilin məzunları üçün isə iyul ayında keçiriləcəkdir. Müsabiqədə iştirak hüququ qazanan abituriyentlərin ixtisas seçimi qəbul imtahanları başa çatdıqdan sonra bir yerdə aparılacaqdır.

Xüsusi qabiliyyət tələb edən ixtisaslara qəbul qaydaları barədə  məlumat verən E.Nağızadə xatırlatmışdır ki, ali və orta ixtisas təhsili müəssisələrinin xüsusi qabiliyyət tələb edən ixtisaslarında təhsil almaq istəyən abituriyentlər aprelin 1-dən 30-dək elektron ərizələrinin təsdiqini təmin etdikdən sonra aprelin 15-dən 30-dək TQDK tərəfindən yaradılmış müvafiq qabiliyyət imtahanı komissiyalarına (QİK) tələb olunan sənədləri və yaradıcılıq fəaliyyətinə dair işləri təqdim etməklə seçmə turda iştirak etməlidirlər.

QİK-də abituriyentlərin seçdikləri xüsusi qabiliyyət tələb edən ixtisaslara yararlılığı yoxlanılır və yoxlamadan müvəffəqiyyətlə keçənlər qeydiyyata alınırlar. Qeydiyyata alınmış abituriyentlər TQDK tərəfindən mərkəzləşdirilmiş qaydada keçirilən test imtahanlarında iştirak edirlər. Test imtahanlarında topladıqları ümumi balları müvafiq müsabiqə şərtlərini ödəyən abituriyentlər müəyyən olunmuş cədvəl üzrə qabiliyyət imtahanlarında iştirak edirlər.

Jurnalistika ixtisasına qəbul qaydalarındakı yeniliklər barədə məlumat verən E.Nağızadə, eyni zamanda, bildirmişdir ki, TQDK ali və tam orta təhsil bazasında orta ixtisas təhsili müəssisələrinə qəbul olunmaq istəyən abituriyentlər üçün aprelin 6-da respublikanın 22 şəhər və rayonunda sınaq imtahanı keçirəcəkdir.

Konfransda TQDK-nın internet saytının yeni təkmilləşdirilmiş versiyasının istifadəyə verildiyi də diqqətə çatdırılmışdır.