Azərbaycan elminə ağır itki üz vermişdir. Akademik, əməkdar elm xadimi, görkəmli iqtisadçı alim Asəf Nadirov 85 yaşında dünyasını dəyişmişdir.

AzərTAc xəbər verir ki, martın 14-də Azərbaycan Milli Elmlər Akademiyasında görkəmli alimin vida mərasimi keçirilmişdir.

Mərasimdə çıxış edənlər əməkdar elm xadimi Asəf Nadirovun iqtisadiyyat elminə verdiyi töhfələrdən söz açmışlar. Qeyd olunmuşdur ki, akademik 800-dən çox monoqrafiya, dərslik, iri  həcmli elmi məqalələrin müəllifidir. Onun əsərləri Türkiyə, Rusiya, Almaniya, Fransa, Hindistan, Yunanıstan və bir sıra digər ölkələrdə nəşr olunmuşdur. Alim, həmçinin beynəlxalq konqres və simpoziumlarda Azərbaycanı təmsil etmişdir. A.Nadirov “Şərəf” və “Şöhrət” ordenləri, həmçinin bir sıra nüfuzlu elmi mərkəzlərin fəxri diplomu və fərmanları ilə təltif olunmuşdur. Akademik A.Nadirov 2012-ci ilin oktyabrında İqtisadi Əməkdaşlıq Təşkilatının Bakıda keçirilən 12-ci sammitində bu qurumun mükafatını alan ilk və yeganə azərbaycanlı kimi tarixə düşmüşdür.

Akademikin rəhbərliyi altında 7 elmlər doktoru, 70-dən artıq namizədlik dissertasiyası müdafiə edilmişdir. Alimin əsərləri Azərbaycan iqtisadiyyatının inkişafının aktual problemlərinə və xüsusilə də məhsuldar qüvvələrin yerləşdirilməsi, şəhərlərin və regionların inkişafı, sənaye qovşaqları və ərazi-istehsal komplekslərinin səmərəli şəkildə formalaşdırılması və s. aktuallıq kəsb edən problemlərə həsr olunmuşdur.

Görkəmli iqtisadçı alim ikinci Fəxri Xiyabanda dəfn edilmişdir.