Martın 3-də Azərbaycan Müəllimlər İnstitutunda (AMİ) ümummilli lider Heydər Əliyev irsinin öyrənilməsi ilə əlaqədar Nərimanov rayonundakı orta məktəblərin 11-ci sinif şagirdləri üçün dərslərə başlanmışdır.

AMİ-nin mətbuat xidmətindən AzərTAc-a bildirmişlər ki, ulu öndərin anadan olmasının 91-ci ildönümü ilə əlaqədar Nərimanov Rayon İcra Hakimiyyətinin həyata keçirdiyi layihə çərçivəsində

ilk dərsdə Cəbrayıl, Füzuli, Ağdam, Laçın, Kəlbəcər rayonlarından olan məcburi köçkün məktəblərindən 60 şagird iştirak etmişdir.

Azərbaycan Müəllimlər İnstitutunun nəzdində fəaliyyət göstərən Heydər Əliyev Mərkəzində  təşkil olunan dərslər mayın 30-dək davam edəcək və AMİ ilə yanaşı, həm də Yeni Azərbaycan Partiyası Nərimanov rayon təşkilatının qərargahında keçiriləcəkdir. On səkkiz tarix müəlliminin cəlb olunduğu layihədə dərslər Azərbaycan və rus dillərində aparılacaqdır.

Qeyd edək ki, AMİ-nin Heydər Əliyev Mərkəzi 2009-cu ildə müstəqil Azərbaycan Respublikasının qurucusu ümummilli lider Heydər Əliyevin ideyalarının, əbədi yaşarılığının gələcək nəsillərə ötürülməsini təmin  etmək məqsədilə institutun rektoru, Milli Məclisin deputatı, professor Aqiyə Naxçıvanlının təşəbbüsü və qayğısı sayəsində yaradılmışdır.

Ümummilli lider Heydər Əliyevin həyat və fəaliyyətinin ayrı-ayrı səhifələrini özündə əks etdirən mərkəzdə ulu öndərin zəngin həyat yolunu,  dövlətçilik və siyasi fəaliyyətini işıqlandıran çoxlu sayda kitab, fotoşəkil və başqa eksponatlar toplanmışdır.