Təhsil Nazirliyi Sumqayıt Dövlət Universitetinin fəaliyyəti ilə bağlı məsələyə aydınlıq gətirmişdir.

APA-nın xəbərinə görə, Təhsil Nazirliyinin “Facebook” səhifəsində ali təhsillə bağlı vətəndaşların sualları cavablandırılarkən bildirilmişdir ki, maddi-texniki bazası və kadr potensialı qənaətbəxş olan Sumqayıt Dövlət Universitetinin maddi-texniki və tədris-laborator bazasının gücləndirilməsi ilə bağlı Təhsil Nazirliyi tərəfindən müvafiq tədbirlər görülür.

Eyni zamanda, Sumqayıt Dövlət Universitetinin ixtisaslarının sayı artırılır və bununla da Sumqayıtda yaşayan gənclərin rahatlıqla öz şəhərlərində ali təhsil almalarına şəraitin yaradılması nəzərdə tutulur.

Qeyd edək ki, ötən ilin sonlarında prezidentin müvafiq sərəncamı ilə Sumqayıt Dövlət Universitetinin (SDU) rektoru Nadir Qəhrəmanov tutduğu vəzifədən azad olunmuşdur. Təhsil nazirinin əmri ilə Elxan Hüseynov SDU-nun tədris işləri üzrə prorektoru vəzifəsinə təyin olunmuş, həmçinin SDU-nun rektoru vəzifəsinin icrası E.Hüseynova həvalə edilmişdir.