Fevralın 27-də “ADA” Universitetində bu ali məktəbin Karyera Hazırlıq Mərkəzinin təşkilatçılığı, “Azersun Holding” şirkətlər qrupunun dəstəyi ilə keçirilən “İstedad və karyeralar arasında körpü yaradılması” mövzusunda ikinci karyera həftəsi çərçivəsində karyera yarmarkası təşkil olunmuşdur.

AzərTAc xəbər verir ki, yarmarkada dövlət qurumları, eləcə də özəl sektoru təmsil edən şirkət və təşkilatlar iştirak etmişlər.

Karyera Hazırlıq Mərkəzinin rəhbəri Gülnur İsmayıl jurnalistlərə müsahibəsində bu cür yarmarkaların təşkilinin tələbələrin gələcək fəaliyyətlərində əhəmiyyətindən danışmış, “ADA” Universitetinin məzunlarının bir sıra dövlət orqanlarında, eləcə də diplomatik korpuslarda çalışdıqlarını və belə tədbirlərin gənclərin karyera quruculuğunda vacibliyini vurğulamışdır.

Bildirilmişdir ki, Karyera Hazırlıq Mərkəzinin məqsədi tələbələri əmək bazarı ilə tanış etmək və eyni zamanda onları gələcək peşə fəaliyyətinə hazırlamaqdır. Bu, “ADA” Universitetinin tarixində artıq ikinci karyera sərgisidir. 

İştirakçılar müxtəlif şirkətlərin nümayəndələri ilə söhbətlər və məsləhətləşmələr aparmışlar. Bundan əlavə, tələbə gənclər Azərbaycanın ən iri özəl şirkətləri və dövlət qurumlarında vakansiyalar və işəgötürmə prosedurları haqqında informasiya  əldə etmək imkanı qazanmışlar.