Fevralın 24-də “ADA” Universitetində Karyera Hazırlıq Mərkəzinin təşkilatçılığı, “Azersun Holding” şirkətlər qrupunun dəstəyi ilə ikinci karyera həftəsi başlamışdır.

Universitetin prorektoru Fariz İsmayılzadə “İstedad və karyeralar arasında körpü yaradılması” mövzusunda keçirilən karyera həftəsinin açılış mərasimində çıxış edərək tədbirin əhəmiyyətindən danışmışdır. Prorektor bildirmişdir ki, sovet dövründə ali məktəbləri bitirən gənclər təyinatla iş yerlərinə göndərilirdi. Sovet hakimiyyəti dağıldıqdan sonra məzunlara təyinat verilməsi də ləğv edilmiş və bu sahədə Qərb modelinə uyğun sistemdən istifadə edilməsinə başlanılmışdır. Bu baxımdan müxtəlif qurumların təmsil olunduğu karyera həftəsi böyük əhəmiyyət daşıyır.

F.İsmayılzadə tələbələrin gələcək fəaliyyətində önəmli rol oynayan karyera həftəsinin təşkilində əməyi olanlara təşəkkürünü bildirmişdir.

Qeyd olunmuşdur ki, karyera həftəsinin məqsədi panellər, seminar və təqdimatlar vasitəsilə “ADA” Universitetinin tələbələrini ölkədəki iş bazarı və karyera imkanları ilə tanış etməkdir. Bununla yanaşı, tələbə və məzunlar dövlət, qeyri-hökumət və özəl sektoru təmsil edən qurumların nümayəndələri ilə görüşmək və ünsiyyət qurmaq imkanı əldə edəcəklər. Karyera həftəsi çərçivəsində tələbələr iş imkanları ilə yanaşı, yay tətili günlərində peşəkar təcrübə keçmək və qısamüddətli iş imkanları ilə də tanış olacaqlar.

Karyera həftəsi çərçivəsində karyera yarmarkası keçiriləcəkdir. Yarmarkada Azərbaycanda fəaliyyət göstərən müxtəlif sektorlardan 90-dək qurum və şirkət təmsil olunacaqdır.

Tədbirdə “Azersun Holding” şirkətlər qrupunun vitse-prezidenti Tahir Gözəl təqdimatla çıxış etmişdir. Şirkətin nümayəndəsi karyerada uğur qazanmağın yollarından danışmış, bu sahədə təcrübəsini tələbələrlə bölüşmüşdür.

Sonra T.Gözəl gəncləri maraqlandıran sualları cavablandırmışdır.

Daha sonra tədbir “Hökumət karyeraları” mövzusunda panel iclası ilə davam etmişdir. Fariz İsmayılzadənin sədrlik etdiyi iclasda bir sıra dövlət və hökumət qurumlarının nümayəndələri iştirak etmişlər.

Karyera həftəsi fevralın 27-dək davam edəcəkdir.

AzərTAc