Bakı Ali Neft Məktəbində (BANM)  Dövlət Neft Şirkətinin (ARDNŞ) Təlim, Tədris və Sertifikatlaşdırma İdarəsinin Dənizdə insan həyatının mühafizəsi üzrə təlim mərkəzində təlim keçmiş “Neft-qaz mühəndisliyi” ixtisası üzrə təhsil alan 1-ci kurs tələbələrinə Beynəlxalq Dəniz Təşkilatının sertifikatları təqdim edilmişdir.

Bu münasibətlə keçirilən tədbiri açan rektor E. Qasımov BANM-də tədris prosesinin istehsalatla sıx əlaqədə həyata keçirildiyini vurğulamış və tələbələrin ARDNŞ-nin müəssisə və təşkilatlarında istər semestr ərzində, istərsə də qış və yay aylarında uzunmüddətli təcrübə keçmələrini biliklərin mənimsənilməsində vacib amil kimi qiymətləndirmişdir.

ARDNŞ-nin Təlim, Tədris və  Sertifikatlaşdırma İdarəsinin rəisi Fuad Süleymanov yanvar ayında müxtəlif ixtisaslar üzrə təhsil alan 117 tələbəsinin idarənin Kadr Hazırlığı Mərkəzinin laboratoriyalarında və emalatxanalarında, Qobustan regional təlim mərkəzində və Dənizdə İnsan Həyatının Mühafizəsi üzrə Təlim Mərkəzində keçdikləri 10 günlük təlim haqqında məlumat vermişdir.

Dövlət Dəniz Administrasiyasının rəisi Qüdrət Qurbanov dəniz şəraitində təhlükəsizlik qaydalarını mənimsəmiş tələbələrə veriləcək sertifikatların bütün dünyada qəbul edildiyini və gələcək məzunların iştapma prosesində vacib amil kimi qiymətləndiriləcəyini vurğulamışdır.

Sonra təlimdə iştirak edən 47 tələbəyə beynəlxalq sertifikatlar təqdim edilmişdir.

Vaqif BAYRAMOV,
“Xalq qəzeti”