Təhsil Nazirliyi tərəfindən orta ixtisas təhsili müəssisələrində pedaqoji kadr hazırlığı ilə bağlı vəziyyəti yerində araşdırmaq məqsədi ilə cari ilin yanvar ayının sonlarında Lənkəran Dövlət Humanitar, Astara Pedaqoji və Şirvan Dövlət İqtisadiyyat və Humanitar kolleclərində yoxlamalar keçirilmişdir.

Nazirlikdən aldığımız məlumatda bildirilir ki, yoxlamalar zamanı kolleclərin fəaliyyətində akademik və maliyyə pozuntusu hallarına yol verildiyi, normativ hüquqi aktların tələblərinə əməl olunmadığı müəyyən edilmişdir.

Tədrisin təşkilində, tələbələrin biliklərinin qiymətləndirilməsində ciddi nöqsanlara yol verdiyinə və imtahan sessiyasının “müvəffəqiyyətlə başa çatdırılması üçün” tələbələrə qarşı hüquqazidd tələblərin irəli sürülməsinə şərait yaratdığına görə Lənkəran Dövlət Humanitar Kollecinin direktoru Şaban Şəfiyev tutduğu vəzifədən azad edilmişdir. Tədris və imtahan proseslərinin normal gedişini təmin edə bilmədikləri üçün Astara Pedaqoji və Şirvan Dövlət İqtisadiyyat və Humanitar kolleclərinin direktorlarına sonuncu xəbərdarlıqla şiddətli töhmət elan olunmuşdur.

 Samirə ƏLİYEVA,

 “Xalq qəzeti”