Azərbaycan Milli Elmlər Akademiyasının (AMEA) A. Bakıxanov adına Tarix İnstitutunun direktoru, AMEA-nın müxbir üzvü, əməkdar elm xadimi Yaqub Mahmudov Beynəlxalq Sokrat Komitəsinin daha bir mükafatına -  “Kraliça Viktoriya” diplomuna və medalına layiq görülmüşdür.

Tarix İnstitutundan AzərTAc-a bildirmişlər ki, bu mükafat alimə Böyük Britaniyanın Oksford şəhərində “Elm və təhsil: yeni imkanlar və istiqamətlər” mövzusunda beynəlxalq elmi konfransda verilmişdir.

“Kraliça Viktoriya” beynəlxalq mükafatı elm və təhsil sahəsində böyük xidmətləri olan şəxslərə verilir.  

2012-ci ildə AMEA-nın A. Bakıxanov adına Tarix İnstitutu tədqiqat fəaliyyətinə görə Beynəlxalq Sokrat Komitəsinin  “Best Enterprises-2012" diplomuna, bu elm müəssisəsinin direktoru, professor Y. Mahmudov isə  böyük elmi nailiyyətlərinə görə “The Name in Science” (“Elmdə ad”) fəxri tituluna layiq görülmüşdür.