Azərbaycan Tibb Universitetində (ATU) Əməkdar Elm Xadimi, tibb elmləri doktoru, professor  Tağı Tağızadənin  anadan olmasının 90 illik yubileyinə həsr olunmuş təntənəli mərasim keçirilmişdir.

ATU-dan AzərTAc-a bildirmişlər ki, tədbirdə səhiyyə naziri Oqtay Şirəliyev çıxış edərək görkəmli alim Tağı Tağızadənin Azərbaycan tibb elminə verdiyi töhfələrdən, onun apardığı elmi-tədqiqatlardan söhbət açmışdır.

Azərbaycan Tibb Universitetinin rektoru, Milli Məclisin deputatı, akademik Əhliman Əmiraslanov alimin  bu ali təhsil ocağı ilə bağlı elmi fəaliyyətindən danışmışdır. Bildirilmişdir ki, universitetinin formalaşmasında bu cür görkəmli alimlərin, o cümlədən Tağı Tağızadənin əməyi danılmazdır.

Qeyd edilmişdir ki, T.Tağızadə uzun müddət universitetin epidemiologiya kafedrasına rəhbərlik etmiş, burada elmi tədqiqatlar aparmış və bu sahədə yüksək səviyyəli kadrlar yetişdirmişdir.

Tədbirdə mərhum professorun  tələbəsi olmuş, hazırda onun işini davam etdirən ATU-nun epidemiologiya kafedrasının müdiri İbadulla Ağayevin T.Tağızadənin elmi fəaliyyəti haqqında məruzəsi dinlənilmişdir.

Bildirilmişdir ki, görkəmli elm xadimi, məşhur epidemioloq Tağı Tağızadə 1923-cü ildə anadan olmuşdur. Həkim-epidemioloq ixtisasına yiyələnmiş T.Tağızadə 1990-cı ilədək Azərbaycan Səhiyyə Nazirliyində Elmi-Tibb Şurasının idarə heyətinin üzvü olmuşdur. O, Azərbaycan dilində ilk və hələ də yeganə olan “Epidemiologiya” dərsliyinin müəllifidir. 1992-ci ilədək Azərbaycan Tibb İnstitutunun (indiki Azərbaycan Tibb Universiteti) epidemiologiya kafedrasının müdiri olmuş alim, həmçinin Elmi-Tədqiqat Epidemiologiya, Gigiyena və Peşə Xəstəlikləri İnstitutunun direktoru vəzifəsində çalışmışdır. 

Görkəmli alim “Əmək rəşadətinə görə” yubiley medalı, “Şərəf nişanı” ordeninə layiq görülmüşdür.

Tağı Tağızadə 1998-ci ildə vəfat etmişdir. 

Tədbirdə çıxış edənlər alimlə bağlı xatirələrini bölüşmüşlər.