Polşa Respublikasının Azərbaycandakı səfiri Mixal Labenda Bakı Ali Neft Məktəbində (BANM) olmuşdur.

BANM-ın mətbuat xidmətindən bildirmişlər ki, görüşdə bu ali məktəbin rektoru Elmar Qasımov Azərbaycan Respublikası Dövlət Neft Şirkətinin son illər keçdiyi inkişaf yolundan danışmış, şirkətin Azərbaycanda və ölkədən kənarda reallaşdırdığı layihələrdən ətraflı söhbət açmışdır. Təməli ümummilli lider Heydər Əliyev tərəfindən qoyulmuş Azərbaycanın uğurlu neft strategiyası haqqında danışan E.Qasımov qeyd etmişdir ki, hazırda bu siyasət Prezident İlham Əliyev tərəfindən uğurla davam etdirilir.

E.Qasımov vurğulamışdır ki, BANM-ın yaranmasında əsas məqsədlərdən biri də müasir standartlara cavab verən yüksək ixtisaslı kadrların yetişdirilməsidir.

Səfir Mixal Labenda qeyd etmişdir ki, Azərbaycan və Polşa yaxın müttəfiq dövlətlərdir. O, gündən-günə inkişaf edən Azərbaycanda beynəlxalq standartlara cavab verən belə bir ali məktəbin yaradılmasının sevindirici hal olduğunu qeyd etmişdir. Diplomat Bakı Ali Neft Məktəbi ilə müxtəlif təhsil layihələri çərçivəsində əməkdaşlıq etməyə və Polşa Respublikasının ayrı-ayrı ali texniki məktəbləri ilə əlaqələr qurulması üçün lazımi dəstəyi verməyə hazır olduğunu bildirmişdir.

Vaqif BAYRAMOV,
“Xalq qəzeti”