M.F.Axundzadə adına Azərbaycan Milli Kitabxanasında Azərbaycan Respublikasının Prezidenti İlham Əliyevin müvafiq sərəncamına əsasən 100 illik yubileyi qeyd olunan görkəmli ictimai xadim Kamran Hüseynova həsr edilmiş, Mədəniyyət və Turizm Nazirliyi tərəfindən nəşr olunmuş Vaqif Bəhmənlinin “İlin beşinci fəsli. Kamran” kitabının təqdimatı keçirildi. Təqdimat mərasiminə görkəmli elm və mədəniyyət xadimləri, yazıçılar, ictimaiyyət nümayəndələri toplaşmışdılar.

Tədbiri giriş sözü ilə açan Milli Kitabxananın direktoru, əməkdar mədəniyyət işçisi Kərim Tahirov K.Hüseynovun zəngin həyat yolundan qısa söhbət açaraq onun Azərbaycan xalqı qarşısındakı xidmətlərindən danışdı. Sonra mədəniyyət və turizm nazirinin müavini Sevda Məmmədəliyevaya söz verildi. O, Kamran Hüseynovun geniş ictimai fəliyyətindən bəhs edərək bildirdi ki, yeni kitab bu böyük şəxsiyyətin yubileyinə çox dəyərli töhfədir. S.Məmmədəliyeva qeyd etdi ki, onların ailəvi yaxınlığı olmuş, Kamran müəllim onun atası, akademik Yusif Məmmədəliyevlə dost olmuşdur.

Sonra Yazıçılar Birliyinin sədri, xalq yazıçısı Anar, xalq yazıçısı Çingiz Abdullayev, yazıçı Əli İldırımoğlu Kamran Hüseynovun Azərbaycan tarixindəki rolundan bəs etməklə yanaşı, bu görkəmli şəxsiyyət haqqında xatirələrini söylədilər.

Qubadlı Rayon İcra Hakimiyyətinin başçısı Malik İsaqov Kamran Hüseynov haqqında daha ətraflı danışdı. Qeyd etdi ki, Kamran müəllimin 100 illiyinin keçirilməsi Prezident İlham Əliyevin sərəncamı əsasında baş tutmuşdur. Buna görə bütün qubadlılar adından cənab Prezidentə minnətdarlığımı bildirirəm. Kamran müəllimlə bir kənddən olduğuna görə həmişə onunla fəxr etdiyini vurğulayan başçı qeyd etdi ki, Qubadlı rayonunun Çərəli kəndi indi düşmən tapdağı altındadır. Kamran Hüseynov Qubadlının ağır günlərində onlarla bir yerdə olub, qaçqınlıq illərində də qubadlılara həmişə həyan durub. Bu kitab Kamran müəllimin şərəfli həyatının poetik salnaməsidir. Vaqif müəllimə belə bir kitab yazdığına görə minnətdarlığını bildirən Malik İsaqov hələ Kamran müəllim haqqında çoxlu belə kitabların yazılacağını bildirdi.

Kitabın müəllifi, sair Vaqif Bəhmənli öz çıxışında kitab üzərindəki işindən ətraflı bəhs etdi.

Sonda Kamran Hüseynovun qızı, Ailə , Qadin və Uşaq Probleməri üzrə Dövlət Komitəsinin sədri Hicran Hüseynova çıxış edərək ilk növbədə Prezident İlham Əliyevə Kamran Hüseynovun 100 illik yubileyinin keçirilməsi ilə bağlı sərəncam imzaladığına görə dərin minnətdarlığını bildirdi. Mədəniyyət və turizm naziri Əbulfəs Qarayevin yubiley tədbirlərinin hazırlanmasına böyük qayğı ilə yanaşması Kamran Hüseynova göstərilən diqqətin nətiçəsi idi. H.Hüseynova yubileylə bağlı yazılan bu kitabın müəllifinə və onun yaranmasında xidməti olanlara dərin minnətdarlığını bildirdi.

M.MÜKƏRRƏMOĞLU,

“Xalq qəzeti”