Müasir Azərbaycan dövlətinin memarı, ümummilli lider Heydər Əliyevin müstəqilliyimizin qorunub möhkəmləndirilməsində, demokratik hüquqi dövlət quruculuğunda müstəsna rolu və misilsiz xidmətləri qədirbilən xalqımız tərəfindən daim yüksək dəyərləndirilir, əziz xatirəsi böyük ehtiramla anılır. Dekabrın 12-də ulu öndərin vəfatının ildönümü ilə əlaqədar sumqayıtlılar Heydər Əliyevin şəhərin mərkəzində ucaldılan abidəsi önünə gələrək ölməz ruhuna ehtiramlarını bildirmiş, əziz xatirəsinə baş əymişlər. Daha sonra ulu öndərin adını daşıyan parkda yaradılmış Heydər Əliyev Mərkəzində anma mərasimi təşkil olunmuşdur.

Sumqayıt Şəhər İcra Hakimiyyətinin başçısı Eldar Əzizov çıxış edərək Azərbaycanın özü qədər əbədi olan Heydər Əliyevin mənalı ömür yolundan, dövlətimiz və xalqımız qarşısında əvəzsiz xidmətlərindən bəhs etdi.

Natiq bildirdi ki, ötən əsrin 40-cı illərindən etibarən pərvəriş tapan Sumqayıt məhz 70-ci illərdən başlayaraq ümummilli lider Heydər Əliyevin qayğısı nəticəsində təkcə respublikamızda deyil, dünyada tanınan şəhərə çevrildi. Tikilən yeni zavodlar, yaradılan istehsal müəssisələri on  minlərlə insanın iş yeri olurdu.  Sumqayıt çoxlarının taleyinin şəhəri oldu. Həmin dövrdə ikinci bir şəhər tapılmaz ki, Sumqayıt kimi inkişaf etsin, boz çöllər sürətlə yaşayış massivlərinə dönsün.  Ümummilli lider həmin dövrlərdə tez-tez Sumqayıta gələr, burada aparılan quruculuq işləri ilə şəxsən maraqlanar, ictimaiyyət nümayəndələrini dinləyər, onlara öz dəyərli tövsiyələrini verərdi. 1993-cü ildə xalqımızın təkidli tələbi ilə hakimiyyətə qayıdan ümummilli lider həmin illərdə də sumqayıtlılardan rəhbər qayğısını əsirgəməzdi. 16 dəfə Sumqayıta səfər edən Heydər Əliyevin bu şəhərə hər  gəlişi əsl toy-bayrama çevrilərdi.  Ulu öndərin sadə əmək adamları ilə görüşləri, onların yaşayış tərzi ilə maraqlanması hər kəsə unudulmaz təsir bağışlayardı.

E.Əzizov bildirdi ki, ümummilli liderin ideyaları və siyasi kursunu Prezident İlham Əliyev uğurla davam və inkişaf etdirir.  Ölkəmizdə sürətli sosial-iqtisadi tərəqqiyə nail olunmuş, Azərbaycan dünya birliyinin aparıcı dövlətləri üçün mühüm və etibarlı tərəfdaşa çevrilmiş, bir çox tarixi uğurlara imza atmışdır. Ümummilli lider Heydər Əliyevin müəyyən etdiyi milli dövlətçilik prinsiplərinə daim sadiq qalan sumqayıtlılar ulu öndərin şah əsəri olan müstəqil Azərbaycanımızın hərtərəfli inkişafı və müasirləşməsi naminə yorulmaz fəaliyyətində ölkə Prezidentinə layiqli yardımçı olmaq üçün bundan sonra da əllərindən gələni əsirgəməyəcəklər.

Bu gün sumqayıtlıların qəlbində əbədi yaşayan ümummilli lider Heydər Əliyev dühası hələ neçə-neçə nəsillərin yolunu günəş kimi nurlandıracaq.

Əli NƏCƏFXANLI,

“Xalq qəzeti”nin bölgə müxbiri