Azərbaycan Respublikasının Prezidenti yanında Dövlət İdarəçilik Akademiyasında ümummilli lider Heydər Əliyevin anım mərasimi keçirilmişdir. Mərasim iştirakçıları ulu öndərin abidəsini ziyarət edərək önünə gül  dəstələri düzmüş, dahi şəxsiyyətə hörmət və ehtiramlarını bildirmişlər.

Anım tədbirində akademiyanın I tədris işləri üzrə prorektoru, professor Əlikram Abdullayev ümummilli lider, dünya şöhrətli siyasi xadim Heydər Əliyevin xalqımız qarşısındakı misilsiz xidmətlərindən danışmışdır. O, qeyd etmişdir ki, Azərbaycanın müasir tarixində Heydər Əliyevin müstəsna xidmətlərinin ictimai-siyası mahiyyəti hələ uzun illər tədqiqatçıların diqqət mərkəzində olacaq. Müasir Azərbaycan dövlətinin memarı və qurucusu Heydər Əliyevin xatirəsi ölkəmizin  adı yaşadıqca  daim ürəklərdə yaşayacaqdır. 

Tədbirdə çıxış edən Dövlət İdarəçilik Akademiyası Siyasi Araşdırmalar İnstitutunun müdiri professor Elman Nəsirov, magistratura şöbəsinin müdiri professor Namiq Axundov və digərləri dünya şöhrətli siyasi xadim Heydər Əliyevin zəngin həyat və fəaliyyətindən, Azərbaycanın tarixindəki rolundan, demokratik, hüquqi dövlət quruculuğu istiqamətində həyata keçirdiyi uğurlu islahatlardan danışmışlar.

Bildirilmişdir ki, ulu öndər Heydər Əliyev müasir Azərbaycanın mürəkkəb və taleyüklü dövründə dövlətə rəhbərlik missiyasını öz üzərinə götürmüşdür. Dahi şəxsiyyət Azərbaycana rəhbərlik etdiyi illərdə ölkəmizin inkişafı naminə əlindən gələni əsirgəməmişdir. Ulu öndər nəinki xalqımızın parlaq siması, eləcə də dünya siyasi elitasının görkəmli şəxsiyyətlərindən biri kimi tarixdə silinməz iz qoymuşdur.

Vurğulanmışdır ki, ümummilli lider üçün müstəqil Azərbaycan fəlsəfəsinin təməlində azadlıq, demokratiya, iqtisadi tərəqqi, sosial ədalət və rifah dururdu.

 Sonra ulu öndər Heydər Əliyevin müstəqil dövlətimizin yaranmasında, möhkəmləndirilməsində və Azərbaycanın beynəlxalq aləmdə tanınmasında tarixi xidmətlərini əks etdirən qısametrajlı videofilm nümayiş etdirilmişdir. Tədbirin sonunda Rabitə və İnformasiya Texnologiyaları Nazirliyinin ümummilli lider Heydər Əliyevin anadan olmasının 90 illik yubileyinə həsr olunmuş “Mən azərbaycanlıyam” onlayn bilik yarışmasının qalibi, siyasi idarəetmə fakültəsinin II kurs tələbəsi Fərid Məmmədov tədbir iştirakçılarına təqdim edilmiş və bu zəfərin ulu öndərin xatirəsinə gənclərin ehtiramı kimi qiymətləndirilmişdir. 

Əliqismət BƏDƏLOV,

“Xalq qəzeti”