Azərbaycan Texniki Universitetində (AzTU) “Azərbaycanda yüksək texnologiyaların texniki-iqtisadi problemləri” mövzusunda respublika elmi konfransı keçirilir.

Azərbaycan Texniki Universitetindən AzərTAc-a bildirmişlər ki, müvafiq qurumların nümayəndələrinin, alim və mütəxəssislərin, təhsil işçilərinin iştirak etdikləri konfransda AzTU-nun rektoru, professor Havar Məmmədov ümummilli lider Heydər Əliyevin elmin, təhsilin inkişafına daim böyük diqqət və qayğı göstərdiyini, ulu öndərin siyasətinin Azərbaycan Prezidenti İlham Əliyev tərəfindən uğurla davam etdirildiyini vurğulamışdır.  

Konfransın əhəmiyyətindən danışan rektor diqqətə çatdırmışdır ki, bu gün hər bir ölkənin inkişafı elmi-texniki tərəqqi və yeni  texnologiyaların yaradılması, tətbiqi ilə bağlıdır. İnformasiya-kommunikasiya texnologiyaları, biotexnologiya,  nanotexnologiyaları yaradan və tətbiq edən ölkələr güclü  iqtisadiyyata malik olur, çox sürətlə inkişaf edirlər. Bunlar təbii sərvətlərə deyil, bilik iqtisadiyyatına, elmə söykənən texnologiyalardır.

XXI əsrdə ən müasir texnologiyaların xüsusi əhəmiyyət kəsb etdiyini xatırladan professor H.Məmmədov qeyd etmişdir ki, bu texnologiyalar əmək məhsuldarlığının artırılmasına, iqtisadiyyatın inkişafına güclü təsir göstərir. 

Sonra “Azərbaycan 2020: gələcəyə baxış” İnkişaf Konsepsiyasının əsas strateji hədəfləri", “Sənayedə investisiya və innovasiya fəaliyyətinin təşkili” və digər mövzularda məruzələr dinlənilmişdir. 

Ölkəmizdə qazanılan nailiyyətlərdən bəhs edən məruzəçilər bildirmişlər ki, Azərbaycan dayanıqlı iqtisadiyyata malik dövlətə çevrilmişdir.

Elmi konfransın bölmə iclaslarında mövzu üzrə digər məruzələr söylənilmiş, müzakirələr aparılmışdır.