Bu günlərdə Rusiyanın Mari El Respublikasının Yoşkar-Ola şəhərində “İnsan, cəmiyyət, təbiət qlobal transformasiya dövründə: təhlükəsizlik və inkişaf” mövzusuna həsr edilən Beynəlxalq Fənlərarası Elmi Konfrans keçirilmişdir.

Məclisdə ölkəmizi Azərbaycan Turizm İnstitutunun “Turizm biznesinin təşkili və texnologiyası” kafedrasının müdiri, dosent Bahadur Bilalov təmsil etmişdir.

 İnstitutun mətbuat xidmətindən verilən xəbərdə bildirilir ki, Povoljye Dövlət Texnologiya Universitetinin təşkilatçılığı ilə keçirilən konfransda Rusiya, ABŞ, Tacikistan, Azərbaycan və Türkiyənin ali təhsil ocaqlarından nümayəndələr iştirak etmişlər.

Beynəlxalq konfrans 17 bölmədə öz işini davam etdirmişdir. Toplantıda 400-dən çox məruzə dinlənilmişdir. 3 gün davam edən elmi konfransa Azərbaycan Turizm İnstitutunun əməkdaşları Bahadur Bilalov və Şəmsiyə Tahirbəyova “Azərbaycan Respublikasının şimal-şərq regionunda etno-mədəni turizm ehtiyatları”, Qəhrəman Yusipov “Azərbaycanın Lənkəran iqtisadi rayonunun inkişafında turizm sənayesinin əhəmiyyəti”, Könül Rəfiyeva “Mədəni turizmin inkişafının qlobal aspektləri” mövzusunda məruzələr təqdim etmişlər.

Bundan başqa, Azərbaycan nümayəndəsinə etimad göstərilmiş, konfransın fəaliyyəti dövründə ATİ-nin dosenti Bahadur Bilalov ABŞ-dakı Konkord Universitetinin nümayəndələri ilə birlikdə “Turizm və qonaqpərvərlik” bölməsinin işini aparmışlar.

 2014-cü ilin may ayında turizmə dair beynəlxalq forumun keçiriləcəyi təklifi iştirakçılar tərəfindən razılıqla qarşılanmışdır.

Z. BƏŞİRQIZI,

“Xalq qəzeti”