Azərbaycan Turizm İnstitutu beynəlxalq səviyyəli tədbirlərin keçirilməsinə həmişə böyük maraq göstərir. Vaxtaşırı təşkil edilən belə tədbirlər institutunun fəaliyyətinə, tədrisin səviyyəsinə və tələbələrin intellektinə müsbət təsir göstərir.

Bu günlərdə Gürcüstanın Batumi şəhərində “Cənubi Qafqaz sərhədyanı ölkələrin turizmi” mövzusuna həsr olunan üçüncü beynəlxalq əməli görüş-seminar keçirilmişdir. Həmin toplantıda turizm institutunun magistratura, doktorantura və əlavə təhsil şöbəsinin müdiri, fizika-riyaziyyat elmləri namizədi, dosent Nəsirulla Nəsirli və Beynəlxalq əlaqələr şöbəsinin mütəxəssisi Orxan Musa iştirak etmişlər.

İnstitutun mətbuat xidmətindən aldığımız məlumatda bildirilir ki, belə toplantılar ənənəvi olaraq hər il keçirilir. Bu il təşkil edilən görüş-seminarda Azərbaycan Turizm İnstitutunun əməkdaşları “Azərbaycanda inkişaf perspektivləri olan turizm növləri” haqqında məruzə-təkliflərlə çıxış etmişlər. Azərbaycan tərəfinin təqdim etdiyi təkliflər paketi seminar iştirakçıları tərəfindən maraqla qarşılanmışdır. Təkliflər paketi ölkədə turizm potensialı və turizm növləri, inkişaf perspektivləri, region ölkələri üçün “müalicə turizmi”, “uşaq və gənclər turizmi” kimi aktual problemlərin həlli yollarının elmi izahını əsaslanmışdır. 3 qrup formatında iki gün davam edən əməli görüş-seminarın gedişatında N. Nəsirli və O. Musanın region universitetləri, müvafiq ali təhsil müəssisələrinin inkişafı, bakalavr, magistr, doktorantura təhsili sahəsində əməkdaşlıq formaları, vahid elmi jurnal və web saytın yaradılması, doktorantlar üçün təqaüdlərin, həmçinin yay məktəblərinin təşkili barədə irəli sürdükləri təkliflər geniş fikir mübadiləsinə səbəb olmuşdur.

Görüş-seminarın sonunda Türkiyə, İran, Gürcüstanın müvafiq ali təhsil, turizm nazirlik və agentliklərinin nümayəndələri arasında memorandum imzalanmışdır. Ənənəvi növbəti əməli görüş-seminarın İranda keçirilməsi qərara alınmışdır.

Z. BƏŞİRQIZI,“Xalq qəzeti”