“Milli qüruru, milli qeyrəti tərənnüm edən şair” mövzusunda  xalq şairi Məmməd Araza  həsr olunmuş  tədbirdə onun həyat və yaradıcılığına  diqqət yetirilib.

F. Köçərli adına Respublika Uşaq  Kitabxanasının direktoru Şəhla Qəmbərova çıxış edərək bildirmişdir ki,  mərasim Prezident İlham Əliyevin Azərbaycan ədəbiyyatının görkəmli nümayəndəsi, xalq şairi Məmməd Arazın anadan olmasının 80 illik yubileyinin keçirilməsi haqqında sərəncamına əsasən təşkil olunmuşdur.

Tədbirdə şairin ailə üzvləri və yaxınları, Mədəniyyət və Turizm Nazirliyinin əməkdaşları, yazıçı və bədii qiraət ustaları, Bakının müxtəlif rayonlarının orta məktəb şagirdləri iştirak etmişlər.

Məmməd Arazın 80 illiyinə həsr olunmuş videoçarx nümayiş olunmuşdur.

Tədbirin sonunda  şairin  80 illik yubileyi münasibətilə noyabr ayında keçirilmiş şeir müsabiqəsinin qaliblərinin adları açıqlanmışdır.  Müsabiqədə   47 nömrəli orta məktəbin şagirdi Fidan Məmmədli birinci, 189 nömrəli məktəbin şagirdi Nuray Cəfərova ikinci, 160 saylı məktəbin nümayəndəsi Tural Məmmədli üçüncü yerləri tutmuşlar. Qaliblər  diplom və hədiyyələr ilə mükafatlandırılmışdır.

Ülviyyə VAHİDQIZI,

“Xalq qəzeti”