Noyabrın 7-8-də Qara Dəniz Universitetləri Şəbəkəsinin (QDUŞ) icraçı şurasının iclasında Bakı Ali Neft Məktəbinin (BANM) müraciətinə baxılmış və ali təhsil müəssisəsi QDUŞ-un nizamnaməsinin tələblərinə cavab verdiyinə görə bu təşkilata üzv qəbul edilmişdir.

Adı çəkilən ali təhsil müəssisəsinin Qara Dəniz Universitetləri Şəbəkəsinə üzv qəbul edilməsi bu təşkilatın baş katibi, professor Eden Mamutun məktəbin rektoru Elmar Qasımova ünvanladığı məktubla təsdiqlənmişdir. Məktubda QDUŞ-un Beynəlxalq Daimi Katibliyinin adından BANM-in tədris və elmi-tədqiqat sahəsində malik olduğu potensialın təşkilatın fəaliyyətinə layiqli töhfə verəcəyinə əminlik bildirilmişdir.

QDUŞ Qara Dəniz İqtisadi Əməkdaşlıq Təşkilatının Parlament Assambleyasının tövsiyəsi əsasında Qara dəniz regionu rektorlarının 1998-ci ildə Rumıniyanın Konsanta şəhərində keçirilmiş 2-ci konfransında təsis olunmuşdur. Qurum Qara Dəniz İqtisadi Əməkdaşlıq Təşkilatının üzvü olan 12 ölkənin 100-dən artıq universitetini birləşdirir. Təşkilat Qara dəniz regionunda universitetlər arasında elmi əməkdaşlıq çərçivəsində əlaqələrin qurulması məqsədi ilə yaradılmışdır.

Vaqif BAYRAMOV,

“Xalq qəzeti”