LDU-nun mətbuat və informasiya xidmətinin rəhbəri Etibar Əhədov  redaksiyamıza bildirmişdir ki, Rumıniyanın A.İ.Kuza adına Universitetinin nümayəndələri Lənkəran Dövlət Universitetində olmuşlar.

LDU-nun rektoru, fizika-riyaziyyat elmləri doktoru, əməkdar elm xadimi, professor Asəf İsgəndərov təhsil ocağının fəaliyyəti barədə qonaqlara məlumat vermişdir. Bildirmişdir ki, universitetin beynəlxalq əlaqələri ildən-ilə genişlənir. LDU dünyanın 100-ə yaxın qabaqcıl ali məktəbi, o cümlədən Rumıniyanın tədris, elm mərkəzləri ilə tələbə-müəllim mübadiləsi aparır.

Rektor bildirmişdir ki, LDU-da 4 fakültə, 11 kafedra, 14 laboratoriya və mərkəz, idman zalları, stadion, tərcümə mərkəzi, elmi kitabxana, elektron kitabxana, müasir elektron-təhsil şəbəkəsi fəaliyyət göstərir. Hazırda LDU-da 2000-dək tələbə təhsil alır.  Onların təlim-tərbiyəsi ilə 200 nəfərlik professor-müəllim heyəti məşğuldur.

Rumıniyanın A.İ.Kuza adına Universitetinin professoru Lyudmila Bejenaru görüş üçün minnətdarlığını bildirmişdir. Qeyd etmişdir ki, A.İ.Kuza adına Universitet 153 ildir ki, fəaliyyət göstərir, ali məktəbdə 43 mindən çox tələbə təhsil alır, professor-müəllim heyəti 3 min nəfərdir. Qonaq bildirmişdir ki, Rumıniya Universiteti Azərbaycanın 3 ali məktəbi – Bakı-Slavyan Universiteti, Qərb Universiteti və Lənkəran Dövlət Universiteti ilə elmi əlaqələri ilbəil genişləndirir.

LDU-nun humanitar və pedoqoji elmlər fakültəsində tələbələrlə keçirilən görüş qonaqlarda xoş təəssürat oyatdı. Fakültənin dekanı, filologiya elmlər namizədi, dosent Kamran Kazımov qonaqları tədris prosesi ilə ətraflı tanış etmişdir.

L.Bejenaru Azərbaycan tələbələrini Rumıniyanın ali məktəblərində təhsil almağa dəvət etmişdir.

Aida ŞÜKÜRLÜ,

“Xalq qəzeti”