Noyabrın 19-da Azərbaycan Dövlət İqtisad Universitetində (ADİU) Yeni Azərbaycan Partiyasının (YAP) yaranmasının 21-ci ildönümünə həsr olunmuş yığıncaq  keçirilmişdir.

AzərTAc xəbər verir ki, yığıncaqda ADİU-nun rektoru, Milli Məclisin elm və təhsil komitəsinin sədri, professor Şəmsəddin Hacıyev ümummilli lider Heydər Əliyevin rəhbərliyi ilə təsis edilmiş partiyanın keçdiyi şərəfli yoldan, 21 il ərzində qazanılmış uğurlardan, dövlətçiliyimizin qorunması və möhkəmlənməsində, respublikamızın ictimai-siyasi həyatında və tərəqqisində xidmətindən danışmışlar.

YAP Səbail rayon təşkilatının sədri, professor Zahid Qaralov universitetin kollektivini partiyanın vahid namizədi İlham Əliyevin yenidən Prezident seçilməsi münasibətilə təbrik etmişdir. Qeyd etmişdir ki, oktyabrın 9-da keçirilən prezident seçkilərində Səbail rayonundan olan seçicilərin 71 faizi səsvermədə iştirak etmiş və onların 87 faizi məhz İlham Əliyevə səs vermişdir.

Hazırda YAP-ın üzvlərinin sayının 600 mindən çox olduğunu deyən Z.Qaralov YAP-ın yaranma tarixindən danışmışdır. Bildirilmişdir ki, YAP Azərbaycan tarixinin kəşməkəşli günlərində xalqımızın ağır sınaqlara məruz qaldığı bir dövrdə - 1992-ci il noyabrın 21-də böyük siyasi xadim Heydər Əliyevin rəhbərliyi ilə yaradılmışdır. Dünənin, bu günün və gələcəyin partiyası olan YAP ötən 21 ildə çətin və şərəfli yol keçmiş, Azərbaycanı bir çox bəlalardan xilas etmiş, dövlətçiliyimizin qorunması və möhkəmləndirilməsində mühüm rol oynamışdır. Natiq Partiyanın yaradıcısı ümummilli lider Heydər Əliyevin missiyasının bu gün Prezident İlham Əliyev tərəfindən uğurla davam etdirildiyin vurğulamışdır.

YAP ADİU ərazi ilk təşkilatının sədri Zəfər Bayramov 21 illik şərəfli yol keçən YAP-ın güclü siyasi təşkilat olaraq formalaşdığını, Vətənimizin tərəqqisi naminə genişmiqyaslı fəaliyyətini qeyd etmiş, son dövrlərdə gənclərin partiyaya marağının yüksəldiyini diqqətə çatdırmışdır.

Tədbirdə prezident seçkilərində fəal iştirak edən tələbə və əməkdaşlara YAP Səbail rayon təşkilatının fəxri fərmanları, partiyanın yeni üzvlərinə vəsiqələr təqdim olunmuşdur.