Qonağı qəbul edən BANM-in rektoru Elmar Qasımov bildirmişdir ki, Kuba ilə Azərbaycan arasında hər zaman sıx  əlaqələr olmuşdur və bu gün də dost münasibətlər yüksək səviyyədə davam etməkdədir. BANM-in fəaliyyəti haqqında səfirə ətraflı məlumat verən E.Qasımov vurğulamışdır ki, BANM-in yaranmasında əsas məqsəd dinamik inkişaf edən Azərbaycan üçün yüksək ixtisaslı kadrların hazırlanmasıdır. 

Daha sonra rektor ali məktəbin beynəlxalq əlaqələrinin genişləndirilməsinin vacibliyini xarırladaraq demişdir ki, beynəlxalq təhsil sisteminin tələblərinə uyğun yaradılmış bu ali məktəbin önəm verdiyi əsas məsələlərdən biri də dünyanın  aparıcı təhsil mərkəzləri ilə əlaqələrin qurulmasıdır. Qısa müddət ərzində bu istiqamətdə görülmüş işlər haqqında məlumat verən Elmar Qasımov bildirmişdir ki, Kuba Respublikasının elm və təhsil mərkəzləri ilə əməkdaşlıq əlaqələrinin qurulması xüsusi maraq kəsb edir.

Səfir Ömər Senon Medina Kintero BANM-ə gəlişindən məmnunluq hissi keçirdiyini diqqətə çatdırmışdır. Qeyd etmişdir ki, Azərbaycanda yüzlərlə kubalı tələbə təhsil almışdır və bu gün də oxuyanlar var. “Kubada neft-qaz sənayesi o qədər də inkişaf etməmişdir, lakin buna baxmayaraq, Azərbaycanda təhsil alan tələbələrin əksər hissəsi bu gün Kubada yüksək vəzifələrdə çalışır”.

Azərbaycanda səfir kimi fəaliyyətə başladığı zamandan etibarən Azərbaycan və Kuba arasında bir sıra təhsil layihələrinin reallaşdırılması istiqamətində işlər görüldüyünü söyləyən səfir iki ölkə arasında müvafiq sahədə əməkdaşlıq münasibətlərinin inkişaf etdirilməsinin vacibliyini qeyd etmişdir. Bildirmişdir ki, bu gün Kuba dövləti yalnız öz daxili enerji tələbatını ödəyə biləcək səviyyədə neft-qaz hasil edir, lakin mütəxəssislərin bildirdiyinə görə, Kubada zəngin neft yataqları var. Gələcəkdə həmin yataqların istismarı zamanı azərbaycanlı  mütəxəssislərin təcrübələrindən geniş bəhrəniləcək. 

Vaqif BAYRAMOV,

“Xalq qəzeti”