Azərbaycan Milli Elmlər Akademiyasının (AMEA) prezidenti, akademik Akif Əlizadə Bakıda səfərdə olan Yaponiyanın “Tokyo Boeki Technology Ltd” şirkətinin prezidenti Kazuey Uçidanın rəhbərlik etdiyi nümayəndə heyətini qəbul etmişdir.

Görüşdə AMEA-nın elmi-innovativ nailiyyətlərinin istehsalatda tətbiqini təcrübədən keçirməyə imkan verən texnoparkların yaradılması sahəsində Yaponiya şirkətinin təcrübəsindən və məhsullarından faydalanmaq məsələsi nəzərdən keçirilmişdir.

AMEA ilə Yaponiyanın elmi-tədqiqat qurumları arasında mövcud əlaqələrdən danışan, Yaponiya mütəxəssislərinin iş təcrübəsinin Azərbaycan alimləri üçün maraqlı olduğunu söyləyən akademiya rəhbəri  əməkdaşlığın bundan sonra da səmərəli olacağını, ölkəmizdə elm və texnalogiyanın transferi sahəsində birgə işlərin inkişafına töhfə verəcəyini bildirmişdir.

K.Uçida qeyd etmişdir ki, 1947-ci ildə yaradılmış “Tokyo Boeki Technology Ltd” energetika, maşınqayırma, metal sənayesi, eləcə də elmi-analitik cihazların istehsalı və satışı ilə tanınır. Şirkətin iki qiymətli və müasir elektron mikroskopu Azərbaycan Respublikası Prezidenti yanında Elmin İnkişafı Fondunun qrant layihələri çərçivəsində alınaraq Geologiya İnstitutu və Azərbaycan Tibb Universitetində quraşdırılmışdır. Yaxın zamanda Fizika İnstitutuna da yeni cihazların alınacağı gözlənilir.

Görüşdə əməkdaşlığın genişləndirilməsinin vacibliyi vurğulanmış və bu əlaqələrin “Tokyo Boeki Technology” təcrübəsi əsasında AMEA-da müasir texnoparkın təşkilinə yönəldilməsi barədə razılığa gəlmişlər. Təklif olunmuşdur ki, Bakıda elmi-innovativ nəticələrin istehsalatda tətbiqinə dair birgə beynəlxalq konfrans keçirilsin.

R.TAHİR, “Xalq qəzeti”