M.V.Lomonosov adına Moskva Dövlət Universitetində “Qlobalistika-2013" III Beynəlxalq Elmi Konqres keçirilmişdir.

Universitetin ”Qlobal proseslər" fakultəsinin təşəbbüsü ilə artıq üçüncü dəfə baş tutan elmi forum YUNESKO və Qlobal Tədqiqatların Beynəlxalq Konsorsiumu kimi beynəlxalq təşkilatların himayəsi altında öz işini aparmışdır.

 Konqresin işində 40 ölkədən 500 nəfərdən çox nümayəndə iştirak etmişdir. Təşkilat komitəsinin sədri, Qlobal Tədqiqatların Beynəlxalq Assosiasiyanın fəxri prezidenti, Rusiya EA-nın vitse-prezidenti, MDU-nun rektoru, akademik Vüktor Sadovniçi konqresin işinə uğurlar arzulamışdır.

Rusiyada qlobal tədqiqatların əsasını qoymuş böyük alim V.İ.Vernadskinin 150 illik yubileyinə həsr olunmuş konqresdə Azərbaycanı təmsil edən alimlər arasında Rusiya Fəlsəfə Cəmiyyətinin üzvü, fəlsəfə doktoru, respublikanın əməkdar müəllimi, Astara Pedaqoji Kollecinin direktoru dosent Əlihəsən Həmzəyev də olmuşdur. Ə.Həmzəyev nümayəndələr qarşısında “Qlobal iqtisadiyyat” adlı məruzə ilə çıxış etmişdir. Mövzunu müxtəlif rakurslardan, müasirlik baxımından təhlil edən alimin məruzəsi xüsusi maraqla qarşılanmışdır.

Əli NƏCƏFXANLI,

“Xalq qəzeti”