Azərbaycan Turizm İnstitutunda Azərbaycan Respublikasının Dövlət Bayrağı Günü münasibəti ilə dama idman yarışı keçirilmişdir. Yarışın keçirilməsində məqsəd 9 noyabr Azərbaycan Bayrağı Gününün yaranma tarixinin tələbələr arasında geniş təbliği, taleyimizdə oynadığı rol, o cümlədən kollektiv üzvləri arasında dama idman növünün  yayılması və inkişaf etdirilməsi olmuşdur.

İnstitutun mətbuat xidmətindən aldığımız məlumatda bildirilir ki, ölkəmizdə 2009-cu ildən dövlət səviyyəsində qeyd olunan Dövlət Bayrağı Günü münasibətilə təşkil edilən tədbir Azərbaycan Turizm İnstitutunun Həmkarlar İttifaqı Komitəsi, “Covqan” idman klubu, Tələbə Gənclər təşkilatı və Nərimanov Rayon Gənclər və İdman İdarəsi tərəfindən təşkil olunmuşdur. Qalib adı uğrunda institutun tələbə, müəllim və inzibati heyət üzvlərindən 54 nəfər mübarizə aparmışdır.  2 gün davam edən dama idman yarışlarında Emin Muxtarov I yeri, Aydın Böyükkişizadə II yeri və Üzeyir Tağızadə III yeri tutmuşdur.

Yarışın sonunda qaliblərə qiymətli hədiyyələr, xatirə medalları, ATİ-nin, həmçinin Nərimanov Rayon Gənclər və İdman İdarəsinin təsis etdikləri diplomlar verilmişdir.

Z. BƏŞİRQIZI,

“Xalq qəzeti”