Avstriya Respublikasının Azərbaycandakı fövqəladə və səlahiyyətli səfiri Silvia Mayer - Kaybiç, bu ölkənin İqtisadiyyat, Ailə və Gənclər Nazirliyinin Enerji və Mədən Departamentinin direktor müavini, Federal Qazma İdarəsinin rəhbəri Artur Maurer, Leoben Montan Universitetinin neftin istehsalı və emalı şöbəsinin müdiri Herbert Hofstatter və ARDNŞ-in Avstriyadakı nümayəndəliyinin rəhbəri Gülmirzə Cavadov Bakı Ali Neft Məktəbində olmuşlar. 

Görüşdə rektor Elmar Qasımov bildirmişdir ki, Bakı Ali Neft Məktəbinin yaranmasında əsas məqsəd istər Azərbaycanda, istərsə də ölkənin hüdudlarından kənarda fəaliyyətini genişləndirən ARDNŞ üçün beynəlxalq standartlara cavab verən, ingilis dilli kadrların hazırlanmasıdır.

Daha sonra rektor ali məktəbin beynəlxalq əlaqələrinin genişləndirilməsinin vacibliyini qeyd edərək vurğulamışdır ki, Avropa təhsil sisteminin tələblərinə uyğun yaradılmış bu ali neft məktəbinin önəm verdiyi əsas məsələlərdən biri də Avropanın aparıcı təhsil mərkəzləri ilə əlaqələrin qurulmasıdır. Avstriyanın təhsil və tədris sisteminə böyük maraq göstərdiyini bildirən rektor diqqətə çatdırmışdır ki, məktəb Avstriyanın neft-qaz və kimya sənayesi sahəsində fəaliyyət göstərən institutları ilə əməkdaşlıq əlaqələrinin qurulmasında və onların təcrübələrindən yararlanmaqda maraqlıdır. E. Qasımov qeyd etmişdir ki, bu məqsədlə istər Avstriyanın  Azərbaycandakı səfirliyi, istərsə də ARDNŞ-in bu ölkədəki nümayəndəliyi vasitəsilə sözügedən istiqamətdə müəyyən danışıqlar aparılmış və nəticədə Avstriyanın neft, kimya sənayəsi üzrə tanınmış təhsil ocağı  olan Leoben Montan Universitetilə əməkdaşlıq gücləndirilmişdir.

Daha sonra Bakı Ali Neft Məktəbi ilə Leoben Montan Universiteti arasında gələcək əməkdaşlığın perspektivləri və birgə fəaliyyət istiqamətləri ətrafında müzakirələr aparılmış, Azərbaycanın neft ixracı sahəsindəki təcrübəsindən,  Bakı Ali Neft Məktəbinin yaradılmasının əhəmiyyətindən danışılmışdır.

Vaqif BAYRAMOV,

 “Xalq qəzeti”